رینجرز کے اعتراض پر پولیس سیٹ اپ تبدیل نہ کرنے کا فیصلہ سندھ حکومت نے وفاق کو آگاہ کردیا

تمام اداروں میں مشاورت کے لیے کوآرڈینیشن کمیٹی کا قیام آئندہ چند روزمیں متوقع

عامر خان January 16, 2014

تمام اداروں میں مشاورت کے لیے کوآرڈینیشن کمیٹی کا قیام آئندہ چند روزمیں متوقع

KARACHI: وفاقی اورسندھ حکومتوں نے اس بات پر اتفاق کیا ہے کہ کراچی میں ٹارگٹڈ آپریشن نتائج کے حصول تک جاری رکھا جائے گا۔

کراچی میں ٹارگٹڈ آپریشن کے دوران تمام اداروں میں رابطوںاور مسائل کا حل باہمی مشاورت سے طے کرنے کیلیے ایک کوآرڈیشن کمیٹی چندروزمیں قائم کردی جائیگی،سندھ حکومت نے وفاق کو آگاہ کیاہے کہ کراچی آپریشن ٹیم اورپویس سیٹ اپ کوتبدیل کرنے کا کوئی فیصلہ نہیں کیاہے،ضرورت محسوس کی گئی تو حالات کے مطابق اتفاق رائے سے اس کو طے کیا جائے گا ، ذرائع کے مطابق وفاقی حکومت نے کراچی میں مختلف ڈی آئی جیز اور ایس ایس پیز افسران کے تبادلوں کی اطلاعات پر رینجرز کے تحفظات اور اس کو حل کرنے کے لیے اپنا کردار ادا کرنا شروع کردیا ہے،وزیر اعظم میاں محمد نواز شریف نے وفاقی وزراء چوہدری نثار علی خان اورسینیٹراسحاق ڈارکوخصوصی ہدایات جاری کرتے ہوئے واضح کیاہے کہ کراچی میں جاری ٹارگٹڈ آپریشن پر سندھ حکومت اور رینجرز کے درمیان تبادلوں کے حوالے سے جو مسائل پیداہوئے ہیں، ان کوفوری حل اورفنڈزکی فراہمی سمیت سندھ حکومت کوجن وسائل کی ضرورت ہوگی،وہ مہیاکیے جائیںگے۔

انتہائی باخبرذرائع نے ایکسپریس کوبتایاکہ آپریشن کے حتمی مرحلے کا آغاز 20 جنوری کے بعد فوری شروع کردیا جائے گا ،ذرائع نے بتایا کہ ایس ایس پی سی آئی ڈی چوہدری اسلم کی گذشتہ ہفتے ایک دھماکے میں شہادت کے بعدگزشتہ روز اچانک یہ اطلاعات سامنے آئیں کہ سندھ حکومت کراچی میں مختلف ڈی آئی جیز اور ایس ایس پیز افسران کو تبدیل کررہی ہے،ان افسران میں ڈی آئی جی ساؤتھ عبدالخالق شیخ ، ڈی آئی جی ایسٹ منیر شیخ ، ڈی آئی جی سی آئی اے سلطان خواجہ ،ایس ایس پی ملیر عمران شوکت سمیت دیگر افسران شامل ہیں ، ان افسران کی جگہ ڈی آئی جی آصف اعجاز شیخ، ایس پی راؤ انوار اور دیگر کو تعینات کیا جارہا ہے، ان تبادلوں کی اطلاعات کے حوالے سے سندھ رینجرزاورکراچی پولیس کے سربراہ شاہدحیات نے اپنے تحفظات کا اظہار کیا ہے ،اس حوالے سے ڈی جی رینجرز میجر جنرل رضوان اختر کی صدارت میں رینجرز کے سینئر افسران کاایک اجلاس منعقد ہوا اور اس اجلاس کے بعدرینجرزکی جانب سے کہاگیاکہ سندھ حکومت کراچی میں جاری ٹارگٹڈآپریشن کے دوران پولیس کے موجودہ سیٹ اپ کو ایک سال تک تبدیل نہ کرے اور تبادلوں کے حوالے سے وزیر اعظم کی ہدایت پر عمل کیا جائے۔

photo 1_zps0ce1b6a2.jpg

ذرائع کے مطابق کراچی پولیس میں تبادلوں کی اطلاعات پراعلیٰ حکام کے ذریعے قانون نافذکرنے والے اداروں نے اپنے تحفظات سے وفاقی حکومت کوآگاہ کردیا ہے، ذرائع کے مطابق وفاقی حکومت نے ان اطلاعات پر فوری طور پر اعلیٰ سطح پر مشاورت کا عمل گذشتہ شب ہی شروع ہوگیا تھا اور وزیر اعظم نواز شریف کووزیر داخلہ چوہدری نثارنے تفصیلی طور پر اس حوالے سے آگاہ کردیا تھا ، اس کے بعد وزیر اعظم نے وفاقی وزیر داخلہ کو ہدایت کی کہ وہ فوری سندھ حکومت اور رینجرز سے رابطہ کریں اور اس حوالے سے ان کے تحفظات دور کیے جائیں ۔ذرائع کے مطابق وفاقی وزیرداخلہ چوہدری نثارنے سندھ حکومت کی اعلیٰ شخصیات سے رابطے شروع کردیے ہیں ، ان رابطوں کے بعد صورت حال میں بہتری آئی ہے اور سندھ حکومت نے واضح کیا ہے کہ کراچی آپریشن ٹیم تبدیل کرنے کا کوئی فیصلہ نہیں کیا ہے۔

ذرائع کے مطابق وزیر اعظم کی ہدایت پروفاقی وزیر خزانہ اسحاق ڈار بدھ کو کراچی پہنچ گئے ،انھوں نے گورنر سندھ ڈاکٹر عشرت العباد خان سے تفصیلی ملاقات کی،ذرائع کے مطابق اس ملاقات میں کراچی میں امن وامان کی صورتحال، ٹارگٹڈ آپریشن،ایم کیوایم ومسلم لیگ(ن)کے تعلقات،آئندہ کے رابطوںاوردیگرا مورپر تفصیلی تبادلہ خیال کیاگیا،ذرائع کے مطابق وفاقی وزیرخزانہ نے واضح کیاہے کہ وفاقی حکومت کراچی میں قیام امن کے حوالے سے ہرممکن وسائل سندھ حکومت کوفراہم کریگی، وفاقی حکومت سے رابطوں کے بعد وزیر اعلیٰ سندھ سید قائم علی شاہ سے ڈی جی رینجرز میجر جنرل رضوان اختر نے وزیر اعلیٰ ہاؤس میں ملاقات کی ، ذرائع کے مطابق ملاقات میں ڈی جی رینجرز نے وزیر اعلیٰ کو کراچی میں جاری ٹارگٹڈ آپریشن پر بریفنگ دی، ڈی جی رینجرز نے وزیر اعلیٰ کوبتایاکہ کراچی میں ٹارگٹڈ آپریشن کامیابی سے جاری ہے اور آپریشن کی کامیابی کے لیے ضروری ہے کہ کراچی پولیس کے موجودہ سیٹ اپ کوتبدیل نہ کیا جائے ۔