کراچی پولیس اہلکاروں سمیت مزید 12 افراد قتل

لیاری فورسز کے کنٹرول سے باہر،گینگ وارجاری،جھٹ پٹ مارکیٹ میں ایک،کھڈامارکیٹ میں2افرادہلاک، ایک شخص کوسرعام گولی مار دی گئی،فوٹو:آن لائن

---

کراچی کے علاقے میں لیاری میں جاری گینگ وار جبکہ دیگرعلاقوں میں فائرنگ اور پرتشدد واقعات میں پولیس اہلکاروں اورسٹی وارڈن سمیت مزید 12 افراد ہلاک اور12زخمی ہوگئے۔

تفصیلات کے مطابق سہراب گوٹھ فلائی اوورکے نیچے قائم گلبرگ ٹریفک سیکشن میں نامعلوم افرادکی فائرنگ سے ٹریفک پولیس کے 2 افسران جاں بحق ہوگئے،مقتولین کی لاشیں عباسی شہید اسپتال لائی گئیں۔ ایس ایچ او یوسف پلازہ ملک ایوب نے ایکسپریس کو بتایا کہ اے ایس آئی 40 سالہ ولی محمد اور ایس آئی 50 سالہ اللہ دتہ چوکی میں مصروف تھے کہ اسی دوران موٹر سائیکل پر سوار 2 ملزمان پہنچے اورچوکی کے اندر گھس کر فائرنگ کردی جس کے نتیجے میں دونوں افسران جاں بحق ہوگئے،اللہ دتہ عباس ٹائون کاجبکہ ولی محمد لیاری کا رہائشی تھا۔پاپوش میٹرک بورڈ آفس کے قریب مسلح افراد کی فائرنگ سے 40سالہ محمدمحمود رضاملک ہلاک ہوگیا،محمود رضا سٹی وارڈن میں بطور انسپکٹر تعینات تھا اوروقوع کے وقت وہ میٹرک بورڈآفس کے قریب اپنے فرائض سرانجام دے رہا تھا کہ موٹر سائیکل سوار 2 ملزمان آئے اور فائرنگ کرکے فرار ہو گئے۔

کھوکھراپارمیں نامعلوم افرادکی فائرنگ سے 16 سالہ ذاکر ہلاک ہوگیا،مقتول علاقے کا رہائشی تھا۔اورنگی ٹائون پاکستان بازار میں سیکٹر16 اے الخضر سوسائٹی میں نجی اسکول کے قریب بوری میں بند2 لاشوں کے ٹکڑے ملے،شناخت چھپانے کی غرض سے انھیں جلایابھی گیاتھا،اورنگی میٹروسینماکے قریب سڑک سے25سالہ شریف خان کی لاش ملی ادھرلیاری کاعلاقہ بدستورقانون نافذکرنے والے اداروں کے کنٹرول سے باہرہے،بغدادکے علاقے کھڈا مارکیٹ میمن سوسائٹی میں وصی اللہ لاکھوگروپ اوربابا لاڈلا گروپ کے کارندے لڑپڑے اوراس دوران دونوں جانب سے جدید اسلحے کاآزادانہ استعمال کیا گیا، فائرنگ کے واقعے میں 2 افرادزوہیب عرف چیچو اوردانش قریشی ہلاک ہوگئے جن کی لاشیں ان کے ساتھی اٹھا کرلے گئے ،ورثا نے الزام لگایا کہ زوہیب اور دانش پولیس و رینجرزکی فائرنگ سے ہلاک ہوئے۔



علاوہ ازیں لیاری کے علاقے گلستان کالونی میں کوئلہ گودام کے قریب موٹرسائیکل سوار دوملزمان ایک مغوی کوساتھ لائے اوراسے کھڑا کرکے سر پر گولی مارکر فرارہوگئے،جھٹ پٹ مارکیٹ میں دوگروپوں کے درمیان فائرنگ سے 25 سالہ زبیرہلاک ہوگیا،مقتول کالعدم امن کمیٹی کا کارندہ تھااور اسے بابالاڈلا کے کارندوں نے فائرنگ کرکے ہلاک کیا۔علاوہ ازیں بغدادی کے علاقے میں دو گروپوں کے درمیان مسلح تصادم میں فائرنگ کی زد میں آکر 24 سالہ جنیدبلوچ زخمی ہوگیا، مضروب چھیپاویلفیئر کاامدادی رضاکارہے۔

بغدادی کے ہی علاقے میں مزید 2افراد 20 سالہ حنین اور 23 سالہ حنید زخمی ہوگئے،گبول پارک کے قریب فائرنگ سے 65 سالہ حاجی علی محمد کچھی اور 33 سالہ محمدامین زخمی ہوگئے،ریکسرلین گلی نمبر 6میں فائرنگ سے45 سالہ نصیراحمد خمی ہوگیا۔بلدیہ میں فائرنگ سے35سالہ رشیدخان،اورنگی ٹائون طوری بنگش میں30سالہ محمداسلام ،اورنگی ٹائون4نمبر پر25سالہ شاکر،ملیرجعفرطیارسوسائٹی غازی ٹائون میں 23 سالہ شاہدحسین،کورنگی سنگرچورنگی کے قریب فائرنگ سے 35 سالہ آصف زخمی ہوگیا۔محمودآباداعظم ٹائون میں گھرکے اندرپستول صاف کرتے ہوئے گولی چلنے سے30 سالہ اسماعیل زخمی ہوگیا۔