وزیر خارجہ کے اسرائیل مظالم بیان پر امریکی اینکر سیخ پا

دنیا بھر میں اس وقت عوامی رائے اسرائیل کے خلاف ہے، شاہ محمود قریشی

---

وزیر خارجہ شاہ محمود قریشی کے فلسطینیوں پر اسرائیلی مظالم سے متعلق سخت موقف اپنانے پر امریکی اینکر سیخ پا ہوگئیں۔

پاکستانی وزیر خارجہ شاہ محمود قریشی نے گزشتہ روز اقوم متحدہ کی جنرل اسمبلی میں اسرائیلی کی نہتے فلسطینیوں پر بمباری کے خلاف نہ صرف بھرپور آواز اٹھائی بلکہ اسرائیل کو جنگی جرائم کامرتکب قرار دیتے ہوئے عالمی برادری سے محاسبہ کا مطالبہ کیا۔

وزیر خارجہ کی اقوام متحدہ میں کی گئی تقریر اسرائیلی مظالم پر خاموش امریکی میڈیا کو ایک آنکھ نہ بھائی اور سی این این کی اینکر نے شاہ محمود پر یہود مخالف ہونے کا الزام عائد کردیا، ایک انٹریو میں سی این این کی اینکر بیانہ گولوڈ ریگا نے وزیر خارجہ سے سیز فائر سے متعلق سوال کیا کہ جس پر شاہ محمود نے دو ٹوک موقف اپناتے ہوئے کہا کہ اسرائیلی مظالم پر عوامی رائے بدل رہی ہے اور عوامی دباؤ بڑھ رہا ہے لہذا اب اسرائیل کے لیے سیز فائر کرنا ناگزیر ہے، اسرائیل ہار رہا ہے، میڈیا میں مضبوط تعلقات کے باوجود اسرائیل میڈیا کی جنگ ہار رہا ہے۔

I had planned to speak with Pakistan’s foreign minister about paths towards a peaceful resolution between Israel and Hamas. Instead, he began the interview by invoking an anti-Semitic slur. Here’s the full interview. https://t.co/W8cOsWotvq

— Bianna Golodryga (@biannagolodryga) May 20, 2021

شاہ محمود قریشی کا دو ٹوک جواب امریکی اینکر کو ایک آنکھ نہ بھایا اور سی این این کی اینکر نے وزیر خارجہ پر فوراً سے یہود مخالف اور یہودیوں سے نفرت انگیز سوچ رکھنے کا الزام لگا دیا جس پر وزیرخارجہ شاہ محمود قریشی نے امریکی اینکر کو سخت جواب دیتے ہوئے کہا کہ اسرائیل کے میڈیا سے مضبوط روابط ہیں اور اس کے لیے خوب پیسہ بھی بہایا جاتا ہے جب کہ دنیا بھر میں اس وقت عوامی رائے اسرائیل کے خلاف ہے اور غزہ میں تباہی کی وڈیوز تصاویر اور مناظر دیکھ کر دنیا کی آنکھیں کھل رہی ہیں۔

سی این این کی اینکر وزیر خارجہ کے نہتے فلسطینیوں پر اسرائیلی وحشیانہ بمباری سے متعلق سخت موقف کو برداشت نہ کرسکیں اور گفتگو میں بار بار یہود مخالف سوچ کا الزام لگاتی رہیں اور اسرائیلی بمباری کو جائز قرار دیا تاہم شاہ محمدود قریشی نے بھر پور انداز میں فلسطین پر پاکستانی موقف پیش کیا اور اسرائیل کے فلسطینیوں پر مظالم سے متعلق اپنی بات ڈٹے رہے۔

[ytembed videoid="-B8b9lIpM4w"]