ذکا اشرف کیخلاف مالی بے قاعدگیوں کی تحقیقات کا حکم

ان کا کام کرنا بہت مشکل ہو گا، ایوان صدر میں اب ممنون حسین ہیں۔ فوٹو محمد جاوید/ایکسپریس/فائل

---

وفاقی وزارت بین الصوبائی رابطہ نے پاکستان کرکٹ بورڈکے چیئرمین ذکا اشرف کے خلاف مالی بے قاعدگیوں کی تحقیقات تیز کرنے کی ہدایت کردی۔

ذرائع کے مطابق پی سی بی کی تحقیقاتی کمیٹی کو چوہدری ذکا اشرف کیخلاف مالی بے قاعدگیوں کی انکوائری بھی جلد مکمل کرنے کی ہدایت کی ہے۔ذرائع کا کہنا تھا کہ اسلام آباد ہائی کورٹ کی جانب سے بحال کیے جانیوالے چوہدری ذکا اشرف کیلیے بطور پی سی بی چیئرمین کام کرنا بہت مشکل ہو گا کیونکہ ایوان صدر میں اب آصف علی زرداری کے بجائے ممنون حسین ہیں اور عبوری کمیٹی بھی وزیر اعظم کے احکام کی روشنی میں مبینہ مالی بے قاعدگیوں کی انکوائری کر رہی ہے۔



حکومت ذکا اشرف کو مالی بے ضابطیوں کی آڑ میں عہدے سے برطرف کرنے کا ارادہ رکھتی ہے جس کیلیے وزیراعظم کی جانب سے وفاقی وزارت بین الصوبائی کو احکام جاری کردیے گئے ۔واضح رہے کہ ذکا اشرف کے خلاف پی سی بی 89ملازمین کی قواعد کے برخلاف بھرتی اور بورڈ کے مالی وسائل کے بے دریغ استعمال سمیت دیگر مالی بدعنوانیوں کے الزامات ہیں۔