کینگروز پی ایس ایل کو چار چاند لگانے کیلیے تیار

عثمان خواجہ کو آبائی وطن پاکستان میں کھیلنے کیلیے مزید انتظار کرنا پڑے گا۔

Sports Desk May 25, 2021

8 کھلاڑی آئندہ ہفتے یو اے ای پہنچیں گے،کٹنگ گلیڈی ایٹرزکی یادوں میں گم۔ فوٹو: فائل

کینگروز پی ایس ایل کو چار چاند لگانے کیلیے تیار ہیں جب کہ تیسرے ڈرافٹ میں مزید 3 آسٹریلوی کھلاڑی پاکستانی ایونٹ کا حصہ بن چکے۔

8 آسٹریلوی کھلاڑی آئندہ ہفتے پاکستان سپر لیگ میں حصہ لینے کے لیے متحدہ عرب امارات پہنچیں گے، جیک وائلڈرمتھ، جیک ویدرلڈ اور ٹم ڈیوڈ پی ایس ایل میں شامل ہونے والے تازہ ترین آسٹریلوی کرکٹرز ہیں،وائلڈرمتھ اور ویدرلڈکی خدمات کوئٹہ گلیڈی ایٹرز نے حاصل کی ہیں، ڈیوڈ لاہور قلندرز کو جوائن کریں گے۔

کوئٹہ گلیڈی ایٹرز کے بین کٹنگ آئی پی ایل ملتوی ہونے کے بعد مالدیپ سے وطن واپس لوٹنے کے بجائے دبئی چلے گئے تھے تاکہ پی ایس ایل کا حصہ بن سکیں، مقابلوں کے حوالے سے آخری لمحات میں پیدا ہونے والی غیریقینی صورتحال کی وجہ سے کٹنگ نے گھر واپس لوٹنے کا فیصلہ کیا، وہ گذشتہ نومبر سے مسلسل بائیوببل میں رہتے ہوئے کرکٹ کھیل رہے تھے۔

34 سالہ کٹنگ نے آسٹریلوی میڈیا سے گفتگو کرتے ہوئے کہا کہ میں پی ایس ایل اور کوئٹہ گلیڈی ایٹرزکو بہت زیادہ پسند کرتا ہوں مگر موجودہ بائیوببل اور قرنطینہ کی وجہ سے صورتحال دشوار ہے، میں نے 30 نومبر کو گھر چھوڑا،اس دوران فروری میں اپنی شادی کے موقع پر بائیوببل سے باہر رہا، مجھے تازہ دم ہونے کے لیے وقفے کی ضرورت ہے۔

دوسرے ڈرافٹ میں عثمان خواجہ اسلام آباد یونائیٹڈ کا حصہ بنے اور اپنے آبائی ملک میں کھیلنے کے حوالے سے کافی پْرجوش تھے، مگر پاکستان میں کھیلنے کا انتظار طویل ہوچکا وہ اب یواے ای جائیں گے،جیمز فالکنر اور کالم فرگوسن لاہور قلندرز کو جوائن کریں گے۔

فواد احمد اور بین ڈنک کی اپنی متعلقہ ٹیموں اسلام آباد یونائیٹڈ اور لاہورقلندرز میں واپسی ہوگی،فواد بھی ان پلیئرز اور اسٹاف میں شامل تھے جن کے کورونا وائرس کا شکار ہونے کی وجہ سے پی ایس ایل کو ملتوی کرنا پڑا تھا۔