پی ڈی ایم کے مردہ گھوڑے کو دوبارہ زندہ کرنے کی کوشش لاحاصل رہے گی عثمان بزدار

نااہل اور نالائق اپوزیشن ٹولے کے پاس کوئی ایجنڈا نہیں، عثمان بزدار فوٹو: فائل

---

وزیراعلیٰ پنجاب عثمان بزدار کا کہنا ہے کہ پی ڈی ایم کے مردہ گھوڑے کو دوبارہ زندہ کرنے کی سعی لاحاصل رہے گی۔

اپنے بیان میں عثمان بزدار کا کہنا تھا کہ پی ڈی ایم کا منفی سیاسی بیانیہ اپنی موت آپ مر چکا ہے، پی ڈی ایم پاکستان کی سیاسی تاریخ کا واحد اتحاد تھا جو بنتے ہی بکھر گیا، یہ لوگ کمیشن اور کک بیکس سے کمائی دولت کو بچانے کے لیے اکٹھے ہوئے تھے، ان کی تحریک تاریک ہو گئی ہے اور صرف گفتن، شنید اور برخاستن تک ہے، یہ استعفوں اور لانگ مارچ کی طرح تحریک چلانے کی بھی ہمت نہیں رکھتے.

عثمان بزدار نے مزید کہا کہ نااہل اور نالائق اپوزیشن ٹولے کے پاس کوئی ایجنڈا نہیں، عوام نے مسترد شدہ عناصر کو یکسر رد کر دیا ہے، پی ڈی ایم کے مردہ گھوڑے کو دوبارہ زندہ کرنے کی سعی لاحاصل رہے گی۔ وزیر اعظم عمران خان کی شفاف اور جرأت مند قیادت کے ہوتے ہوئے ان کو قومی وسائل لوٹنے کا حساب دینا ہوگا۔