سونم کپور ’’ڈولی کی ڈولی‘‘ میں شوہر کو لوٹ کر بھاگنے والی دلہن بنیں گی

ایک ہی طرح کے کردار پسند نہیں،پہلی مرتبہ چالاک لڑکی کے روپ میں آرہی ہوں ، امید ہے شائقین میری اداکاری پسند کریں گے، سونم کپور۔ فوٹو: فائل

---

بالی ووڈ اداکارہ سونم کپور جس نے آج تک سمجھدار اور سادہ کردار ادا کیے ہیں، اب ایک چالاک عورت کا کردار ادا کرکے اپنے مداحوں کو جھٹکا دینے والی ہیں۔

بھارتی میڈیا کے مطابق وہ فلم ڈولی کی ڈولی میں ایک ایسی دلہن کا کردار ادا کر رہی ہیں جو مختلف افراد سے سے شادی کرتی ہے اور پہلی ہی رات کو ان کی تمام دولت لے کر گھر سے فرار ہو جاتی ہے۔ اطلاعات کے مطابق اسی طرح کی ایک فلم پہلے ہی ہالی ووڈ میں اسی نام سے بنائی گئی تھی جس میں اداکارہ جولیا رابرٹس شادی کے فوراً بعد دلہا کی تمام دولت لے کر فرار ہو جاتی ہے۔ ذرائع کے مطابق سونم کپور کو جب فلم کی پیشکش کی گئی تو اس نے صرف تین وجوہات کہ فلم میں جو لوگ ہیں وہ ان کے ساتھ کام کرنے میں آسانی محسوس کرتی ہے، دوسرے فلم کے پروڈیوسر ارباز خان ہیں اور تیسری وجہ یہ تھی کہ وہ ہدایتکار ابھشیک ڈوگرا کے ساتھ کام کرنا چاہتی تھی جس کی وجہ سے اس نے فلم میں کام کرنے کی حامی بھر لی۔ ڈولی کی ڈولی کو مضحکہ خیز فلم بھی کہا جا سکتا ہے کیونکہ یہ ایک ایسا خیال ہے جسے ابھی تک پردہ اسکرین پر دکھانے کی ضرورت محسوس نہیں کی گئی۔

سونم کپور جو اپنے کیریئر کے اہم مقام پر ہے، کی خواہش ہے کہ وہ اچھوتے اور منفرد کردار ادا کرے اور خاص طور پر ایسی فلموں میں نظر آئے جن میں کامیڈی کے ساتھ ساتھ اسے اپنی اداکاری کو بھر پور طریقے سے نمایاں کرنے کا موقع بھی مل سکے۔ کہانی کے مطابق سونم کپور جو فلم میں ڈولی کا کردار ادا کر رہی ہیں، چار یا پانچ لوگوں سے شادی کرتی ہے اور شادی کی پہلی ہی رات کو ان کی تمام دولت لوٹ کر فرار ہو جاتی ہے۔ فلمساز ارباز خان نے کہا ہے کہ یہ درست ہے کہ سونم کپور میری فلم ''ڈولی کی ڈولی'' میں بھاگنے والی دلہن کا کردار ادا کر رہی ہیں۔ میں ایک دلچسپ اسکرپٹ اور اس کے لیے بہترین ہدایتکار کی تلاش میں تھا۔ مجھے ابھشیک ڈوگرا کا اسکرپٹ پسند آیا جس میں مزید تبدیلیاں کرتے ہوئے اسے پہلے سے زیادہ دلچسپ بنا دیا ہے اور ہم بڑی بے صبری سے اپریل کا انتظار کر رہے ہیں جب اس فلم کی شوٹنگز شروع کریں گے۔ ارباز کا کہنا تھا کہ میں ڈرامہ، کامیڈی، رومانس اور گانوں سے بھر پور ایسی فلم بنانا چاہتا تھا جو مجھے اپنی طرف کھینچے۔ مجھے پوری امید ہے کہ لوگوں کی بڑی تعداد اس فلم کو دیکھنے کے لیے آئے گی۔



ان کا مزید کہنا تھا کہ سونم نے اسکرپٹ کو بہت پسند کیا ہے جب کہ فلم میں مرکزی کردار ادا کرنے کے لیے تین اداکاروں پلکت سمراٹ، راجکمار رائو اور ورن شرما کو بھی فائنل کر لیا گیا ہے۔ دریں اثنا سونم کپور کا کہنا ہے کہ فلموں میں ایک ہی طرح کے کردار کرنا پسند نہیں کرتی۔ میری ہمیشہ سے یہ کوشش رہی ہے کہ ایسی فلموں میں کام کروں جن میں نیا پن ہو، مجھے کچھ کر دکھانے کا موقع مل سکے۔ ارباز خان کی پروڈکشن میں بنائی جانے والی فلم ''ڈولی کی ڈولی'' ایسی ہی فلم ہے جس میں کامیڈی کے ساتھ ساتھ دیکھنے والوں کے لیے ایک سبق بھی ہے۔ اپنے کردار کے متعلق ایک سوال کے جواب میں اداکارہ کا کہنا تھا کہ یہ درست ہے کہ میں ابھی تک زیادہ تر سلجھے ہوئے کردار ادا کیے ہیں اور یہ پہلی مرتبہ ہے کہ میں ایک ایسی لڑکی کے کردار میں سامنے آرہی ہوں جو آزاد خیال اور لوگوں کو شادی کے نام پر لوٹنے میں اپنا ثانی نہیں رکھتی۔ مجھے یقین ہے کہ شائقین مجھے اس کردار میں دیکھ کر بھی پسند کریں گے۔ واضح رہے کہ اداکارہ کی فلم ''خوبصورت'' جو 1980ء کی سپرہٹ فلم ''خوبصورت'' کا ری میک ہے، کی شوٹنگز ان دنوں جاری ہے۔

دوسری طرف سونم کپور ہدایتکار نوپور استھانہ کی فلم ''بیوقوفیاں'' میں بھی جلوہ گر ہو رہی ہیں۔ اس فلم میں ان کے ساتھ ایوشمان کھرانہ مرکزی کردار ادا کر رہے ہیں جب کہ رشی کپور بھی اہم کردار میں نظر آئیں گے۔ اطلاعات کے مطابق اس فلم کو 14مارچ کو سینما گھروں کی زینت بنایا جائے گا۔ واضح رہے کہ سونم کپور 9جون 1985 کو بالی ووڈ کے نامور اداکار انیل کپور اور سابق ماڈل سنیتا کپور کے کے گھر ممبئی میں پیدا ہوئی ۔ ۔بطور اداکارہ کیرئیر شروع کرنے سے قبل سونم کپور سنجے لیلا بھنسالی کے ساتھ بطور اسسٹنٹ ہدایتکار کام کرتی رہی ۔2007 میں سونم نے پہلی مرتبہ سنجے لیلا بھنسالی کی فلم ''سانوریا'' میں رنبیر کپور کے ساتھ اپنی اداکاری کے جوہر دکھائے یہ فلم باکس آفس پر کامیابی تو حاصل نہ کرسکی مگراس میں سونم کی پرفارمنس کو سراہا گیا۔2009 میں اداکارہ کی فلم دہلی 6ریلیز ہوئی۔ 2010 میں دو فلمیں ''آئی ہیٹ لو اسٹوری '' اور عائشہ ''،2011 میں ''تھینک یو'' اور ''معصوم ''2012 میں پلئیرز سینما گھروں کی زینت بنائی گئیں۔سال رواں کے دوران سونم کپورنے فلم '' بمبے ٹاکیز'' میں گانے اپنا بمبے ٹاکیز پر خوصوصی پرفارمنس دی جب کہ اس کی دو فلمیں '' رانجھنا '' ، اور بھاگ ملکھا بھاگ سینما گھروں کی زینت بنیں۔گزشتہ برس اداکارہ کی دو فلمیں '' رانجھنا'' اور ''بھاگ ملیکھابھاگ'' ریلیز کی گئیں۔