امریکا میں 13 سالہ ٹک ٹاکر فائر چیلنج ویڈیو بناتے وقت آتشزدگی کا شکار

ٹک ٹاکر کو انتہائی نگہداشت کے وارڈ میں رکھا گیا ہے جہاں ان کی حالت نازک بتائی جارہی ہے

ویب ڈیسک May 31, 2021

13 سالہ ٹک ٹاکر کی حالت نازک بتائی جارہی ہے، فوٹو: ٹوئٹر

امریکی ریاست اوریگون میں 13 سالہ لڑکی ٹک ٹاک پر فائر چیلنج مکمل کرنے کی ویڈیو ریکارڈ کرتے ہوئے آگ میں بری طرح جھلس گئی۔

عالمی خبر رساں ادارے کے مطابق امریکا میں مقیم پورٹ لینڈ سے تعلق رکھنے والی 13 سالہ ڈیسٹینی کرین غسل خانے میں ٹک ٹاک کے لیے فائر چیلنج ویڈیو ریکارڈ کر رہی تھیں۔ اس چیلنج میں آئینے پر بنائی گئیں علامتوں کو آتش گیر مادہ استعمال کرتے ہوئے آگ لگا کر روشن کرنا ہوتا ہے۔

ویڈیو بناتے وقت اچانک آگ تیزی سے بھڑک اُٹھی اور ٹک ٹاکر بری طرح جھلس گئیں۔ انہیں تیسرے درجے کے زخم آئے۔ ڈیسٹینی کو اسپتال لے جایا گیا انہیں انتہائی نگہداشت کے وارڈ میں داخل کیا گیا جہاں حالت نازک بتائی جارہی ہے۔

ٹک ٹاکر کی والدہ نے میڈیا کو بتایا جس وقت ڈیسٹینی کی درد سے رونے اور چیخنے کی آواز آنے پر واش روم کا دروازہ کھولا تو وہاں ہر چیز میں آگ لگی ہوئی تھی اور میری بیٹی بھی بری طرح جھلس گئی تھی۔