سندھ نے ہمیشہ ضد کرکے اپنی بات منوائی اور پنجاب سے قربانی مانگی ہے فردوس عاشق اعوان

جہانگیرترین گروپ کے ارکان ہمارا حصہ ہیں، فردوس عاشق اعوان فوٹو: فائل

---

وزیر اعلیٰ پنجاب کی معاون خصوصی برائے اطلاعات و نشریات ڈاکٹر فردوس عاشق اعوان کہتی ہیں کہ سندھ نے ہمیشہ لاڈلے چھوٹے بھائی کی طرح ضد کرکے بات منوائی ہے اور پنجاب سے قربانی مانگی ہے۔

ایکسپریس نیوز کے پروگرام ایکسپریسو سے خصوصی گفتگو کرتے ہوئے فردوس عاشق اعوان نے کہا کہ پی ڈی ایم میں سے پی نکل گیا ہے ، اب ڈی ایم رہ گیا ہے اور یہ انتشار کا بیانیہ ہے، ان کا عوام کے مفاد اور ملک کی فلاح و بہبود کے لیے کوئی لینا دینا نہیں۔

فردوس عاشق اعوان نے کہا کہ گھر میں ایک دوسرے تحفظات ہوتے رہتے ہیں، گھر کے افراد آپس میں پنجہ آزمائی نہیں کرتے کہ کون کتنا طاقتور ہے، جہانگیرترین گروپ کے ارکان ہمارا حصہ ہیں، وہ پی ٹی آئی کے نظریے پر ووٹ لے کر آئے ہیں، ایک دوسرے پر مقدمات کرانا غیر ذمہ درانہ عمل ہے لیکن جب کسی پر مذہب کے معاملے میں انگلی اٹھائی جاتی ہے تو اسے ناچاہتے ہوئے بھی اپنا دفاع کرنا پڑتا ہے، پارٹی کی سطح پر حل ہوسکنے والا معاملہ تھانے کچہری لے جاکر پارٹی کو مذاق نہیں بنانا چاہیے، انہیں پارٹی کی سینیئر قیادت سے بات کرنی چاہیے تاکہ ایسے معاملات کسی بھی صورت آگے نہ بڑھیں۔

پانی کے مسئلے پر سندھ حکومت کے موقف کے حوالے سے فردوس عاشق اعوان نے کہا کہ بدقسمتی سے پیپلز پارٹی پانی پر سیاست کرکے وفاق کی اکائیوں کو کمزور کررہی ہے، ایسا تاثر دیا جارہا ہے کہ پنجاب سندھ کا حق مار رہا ہے، سندھ نے ہمیشہ لاڈلے چھوٹے بھائی کی طرح ضد کرکے بات منوائی ہے اور پنجاب سے ہمیشہ قربانی مانگی ہے، اس وقت تربیلا اور منگلا ڈیموں میں قابل استعمال پانی کا ذخیرہ بہت کم ہے۔

معاون خصوصی کا کہنا تھا کہ شوگر کمیشن کسی انفرادی شخصیت ہا مل کے ساتھ جڑا نہیں، اس کمیشن کے ذریعے بے ضابطگیوں کی نشاندہی ہوئی، اس میں جہانگیر ترین کا بھی نام آگیا، اب دیکھنا یہ ہے کہ اسے کس طرح سنبھالنا ہے، یہ نہیں ہوسکتا تھا کہ وزیر اعظم اور ان کی جماعت کے ساتھ منسلک کسی شخص کا نام آیا تو اسے اس معاملے سے الگ کرکے ریلیف دیں، ہمیں انصاف اور احتساب کے تقاضوں کو پورا کرنا ہے، وزیر اعظم نے یقین دہانی کرائی کہ ان کے ساتھ ناانصافی نہیں ہوگی، علی ظفر نے رپورٹ اب تک جمع نہیں کرائی ، اس کے حوالے سے قیاس آرائیاں چل رہی ہیں، جب تل وہ رپورٹ نظر عام پر نہیں آجاتی اس وقت تکاس حوالے سے کوئی حتمی رائے قائم نہیں کی جاسکتی۔

اپنی ٹوئٹ میں فردوس عاشق اعوان کا کہنا تھا کہ اپوزیشن جماعتوں کی جانب سے ملکی معیشت کی بہتری پر بھی لغو پراپیگنڈا سمجھ سے باہر ہے۔ ملکی معیشت کی تباہی کی سب سے بڑی ذمہ دار (ن) لیگ کا معیشت کی بہتری کو منفی رنگ دینا بے شرمی کی انتہا ہے۔ معاشی حالت میں بہتری پر پرچی شہزادے کی میں نہ مانوں کی گردان خود کو دھوکہ دینے کے مترادف ہے۔

معاون خصوصی کا کہنا تھا کہ وزیراعظم عمران خان کی قیادت میں معیشت کی بحالی کے لئے اٹھائے گئے اقدامات کے ثمرات عوام تک پہنچ رہے ہیں۔ اپوزیشن خصوصا کرپٹ پی ڈی ایم ٹولے کی مفاد پرستی پر مبنی فیملی لمیٹڈ سیاست آخری سانسیں لے رہی ہے۔ عوام کی طاقت سے اپوزیشن کا ہر منفی پراپیگنڈہ زائل کرتے ہوئے ترقی کا سفر جاری رکھیں گے۔