کورونا ایس او پیز کی خلاف ورزی پر بھارتی براڈ کاسٹر کو ہوٹل سے نکال دیا گیا

پی ایس ایل 6 کا شیڈول مزید تاخیر کا شکار ہوگیا

---

ایس او پیز کی خلاف ورزی پر بھارتی براڈ کاسٹر کو ہوٹل سے نکال دیا گیا۔

ایکسپریس نیوز کے مطابق پی ایس ایل 6 میں نئی مشکل کھڑی ہوگئی، ابوظہبی میں موجود بھارتی براڈ کاسٹر کو ہوٹل سے نکال دیا گیا۔

پاکستان کرکٹ بورڈ کو ابوظہبی میں اس وقت نئے مسائل کا سامنا کرنا پڑگیا جب عرب امارات کے ایس او پیز پر عمل نہ کرنے پر انڈین براڈ کاسٹرز کو ہوٹل سے نکال دیا گیا۔

انڈین براڈ کاسٹرز راسلخیمہ سے سٹرک کے راستے ابو ظہبی پہنچے تھے جس پر انڈین براڈ کاسٹرز کو عرب امارات سے واپس بھارت بھیج دیا گیا جب کہ پی سی بی نے انڈین براڈ کاسٹرز کی جگہ دوسرے براڈ کاسٹرز کے لئے کوششیں شروع کردیں۔

واضح رہے اس سے قبل پاکستان کو پی ایس ایل 6 کے لیے کھلاڑیوں کو متحدہ عرب امارات بھجوانے کے لیے ویزا مسائل کا سامنا تھا، کوئٹہ گلیڈی ایٹرز کے کپتان سمیت متعدد کرکٹرز کو یو اے ای کے ویزے وقت پر جاری نہ ہونے کے باعث مسائل پیدا ہوئے تھے تاہم سرفراز احمد گزشتہ روز ابوظہبی کے لیے روزنہ ہوگئے تھے جو اس وقت بحرین میں موجود ہیں اور آج وہاں پہنچ جائیں گے جب کہ 7 کھلاڑیوں کو اب بھی ویزا جاری نہ ہوسکا اور وہ پاکستان میں انتظار کررہے ہیں۔