قیدِ تنہائی سے آزادی سرفراز احمد نے میدان کا رخ کرلیا

مزید 4کرکٹرز عمر امین، حماد ،خالد عثمان اورآصف آفریدی کو ویزے جاری۔

Sports Reporter June 08, 2021

مزید 4کرکٹرز عمر امین، حماد ،خالد عثمان اورآصف آفریدی کو ویزے جاری۔ فوٹو: فائل

قید تنہائی سے آزادی ملتے ہی سرفراز احمد نے میدان کا رخ کرلیا جب کہ کوئٹہ گلیڈی ایٹرز کے کپتان قرنطینہ مکمل ہونے پریکٹس میچ کیلیے اسٹیڈیم پہنچ گئے۔

پی ایس ایل 6میں شرکت کیلیے 27مئی کو لاہور اور کراچی سے جانے والی 2 چارٹرڈ پروازوں میں بیشتر کرکٹرز،معاون اسٹاف ارکان اور پی سی بی آفیشلز ابوظبی پہنچ گئے تھے، 25افراد ویزا مسائل کی وجہ سے روانہ نہیں ہوسکے تھے، ان میں سے 16کو ویزے جاری ہوئے مگر سفری دستاویزات نامکمل ہونے کی وجہ سے سرفراز احمد سمیت 11افرادکو ایئرپورٹ سے واپس آنا پڑا، بعد ازاں 12کی رخصتی ہوئی، کوئٹہ گلیڈی ایٹرز کے کپتان سرفراز احمد یکم جون کو ابوظبی پہنچ گئے تھے۔

گذشتہ روز ان کا قرنطینہ مکمل ہوگیا، آخری کورونا ٹیسٹ بھی کلیئر ہونے پر سرفراز احمد کو اسکواڈ میں موجود دیگر کھلاڑیوں کو جوائن کرنے کی اجازت دیدی گئی،وکٹ کیپر بیٹسمین بھی کھیلنے کی آزادی ملتے ہی کوئی وقت ضائع کرنے کے بجائے پریکٹس میچ میں شرکت کیلیے اسٹیڈیم پہنچ گئے۔

دریں اثناء ایونٹ میں شرکت کیلیے مزید 4 کھلاڑیوں کو یو اے ای کا ویزہ جاری کردیا گیا، ان میں عمر امین، حماد اعظم، خالد عثمان اور آصف آفریدی شامل ہیں۔ چاروں کرکٹرز کو پہلی دستیاب فلائیٹ سے ابوظبی پہنچانے کے انتظامات کیے جارہے ہیں، اب صرف ایک کرکٹر عمران رندھاوا کا ویزہ تاحال جاری نہیں ہوا،ملتے ہی روانگی کا انتظام کیا جائے گا۔

یاد رہے کہ تاخیر سے پہنچنے والے کھلاڑی اور آفیشلز قرنطینہ کی مدت پوری ہونے پر اپنے اسکواڈز کو جوائن کرسکیں گے،پی ایس ایل کا آغاز بدھ کو ہوجائے گا،اگر چاروں کھلاڑی 1،2روز میں بھی ابوظبی روانہ ہوجاتے ہیں تو ایونٹ کے پہلے ہفتے میں سلیکشن کیلیے اپنی ٹیموں کو دستیاب ہونے کے بجائے الگ الگ کمروں میں وقت گزارتے ہوئے میچ ٹی وی پر دیکھیں گے۔