صومالیہ میں فوجی کیمپ پر خود کش حملہ 15 ہلاک

ہلاک اور زخمی ہونے والے اہلکاروں کو مدینہ اسپتال منتقل کیا گیا ہے، فوٹو: اے ایف پی

---

صومالیہ میں ملٹری ٹریننگ کیمپ پر خود کش بمبار نے خود کو بارودی مواد سے اُڑادیا جس کے نتیجے میں 15 افراد اہلکار اور متعدد زخمی ہوگئے۔

عالمی خبر رساں ادارے کے مطابق صومالیہ کے دارالحکومت موغادیشو میں فوج میں نے بھرتی ہونے والے اہلکاروں کے لیے ایک ٹریننگ کیمپ لگایا گیا تھا۔ کیمپ کے باہر اہلکاروں کی لمبی قطار لگی ہوئی تھی کہ اچانک زوردار دھماکا ہوگیا۔

صومالوی آرمی آفیسر محمد عدن نے میڈیا کو بتایا کہ یہ خودکش حملہ تھا، حملہ آور نے اہلکاروں کے درمیان قطار میں کھڑے ہوکر خود کو بارودی مواد سے اُڑا لیا۔ خودکش حملے میں نئے بھرتی ہونے والے 15 اہلکار ہلاک اور متعدد زخمی ہوگئے۔ ہلاکتوں میں اضافے کا خدشہ ہے۔

دھماکے کے بعد سیکیورٹی فورسز نے علاقے کا محاصرہ کرلیا صرف ایمبولینس کو جانے کی اجازت دی جا رہی ہے۔ درجن سے زائد زخمیوں کو موغادیشو کے مدینہ اسپتال منتقل کیا گیا ہے۔

تاحال کسی نے اس دھماکے کی ذمے داری قبول نہیں کی ہے، تاہم قرون افریقا میں شدت پسند تنظیم الشباب کی جانب سے اکثر و بیشتر اس طرح کی کارروائیاں کی جاتی ہے۔