جینیفر لوپز نیٹ فلیکس کی سنسنی خیز فلم ’ایٹلس‘ میں جلوہ گر ہوں گی

مداح 2022 میں جینیفر لوپز کو فلم ’Marry Me‘ میں بھی دیکھ سکیں گے۔

---

ANKARA, TURKEY: امریکی گلوکارہ و اداکارہ جنیفر لوپز نیٹ فلیکس کی نئی آنے والی سنسنی خیز فلم 'ایٹلس' میں جلوہ گر ہوں گی۔

گلوکارہ جینیفر لوپز نے نیٹ فلیکس کے ساتھ فلم 'ایٹلس' کے لیے معاہدہ کرلیا ہے۔ سنسنی خیز فلم میں جینیفر لوپز اداکاری کے ساتھ ساتھ پروڈیوسر کے فرائض بھی انجام دیں گی۔

نیٹ فلیکس کی مختصر فلم ایٹلس سائنس فکشن سے متعلق ہے جس میں ایک خاتون مصنوعی انٹیلی جنس کے حامل سپاہی کے اس بیانیے کے خلاف لڑتی ہیں جس میں وہ کہتا ہے کہ' جنگ کے خاتمے کا واحد حل انسانیت کا خاتمہ ہے'۔

اس سپاہی کاسامنا کرنےکے لیے خاتون ایک دوسرے مصنوعی انٹیلی جنس سپاہی کے ساتھ مل کر کام کرنے لگتی ہیں جس سے درحقیقت وہ بہت زیادہ خوف زدہ ہوتی ہیں۔

فلم ایٹلس میں ڈائریکٹر کے امور بریڈ پیٹن انجام دیں گے۔فلم کا اسکرپٹ آرون ایلی لکھ رہے ہیں ۔اس فلم کو پیٹن اور جیف فریسن اے ایس اے پی انٹرٹیٹمنٹ پروڈکشن کمپنی کے لیے بنائیں گے۔

اس کے بعد مداح جینیفر لوپز کو فلم 'Marry Me' میں اداکار اوون ولسن کے ساتھ دیکھ سکیں گے۔ یہ فلم 2022 میں ریلیز ہوگی۔