پی سی بی نے قومی کرکٹ ٹیم کے نئے ہیڈ کوچ کی تلاش کے لئے کمیٹی کا اعلان کردیا

کوچ کی تلاش کے لئے ملکی اور بین الاقوامی طور پر اشتہار دیئے جائیںٕ گے اور انٹریوز کے بعد ہیڈ کوچ کا انتخاب کیا جائے گا. فوٹو: فائل

---

پاکستان کرکٹ بورڈ نے ڈیو واٹمور سے معاہدے کی مدت مکمل ہونے کے بعد قومی ٹیم کے لئے نیا ہیڈ کوچ مقرر کرنے کے لئے 4 رکنی کمیٹی کا اعلان کردیا ۔

ایکسپریس نیوز کے مطابق پی سی بی کی جانب سے اعلان کردہ کمیٹی وسیم اکرم، انتخاب عالم ، راشد لطیف اور سبحان احمد پر مشتمل ہے، یہ کمیٹی ڈیو واٹمور کی جگہ قومی کوچ کا انتخاب کرے گی، کوچ کی تلاش کے لئے ملکی اور بین الاقوامی طور پر اشتہار دیئے جائیںٕ گے اور انٹریوز کے بعد ہیڈ کوچ کا انتخاب کیا جائے گا۔

واضح رہے کہ ڈیو واٹمور کا معاہدہ پاک لنکا سیریز کے بعد ختم ہوجائے گا اور پی سی بی نے پہلے ہی ان سے معاہدے میں توسیع نہ کرنے کا اعلان کردیا ہے۔