پی ایس ایل 7 پاکستان میں ہوگی چیئرمین پی سی بی

اپنی تمام کرکٹ ہوم گراؤنڈز پر کھیلیں گے، شائقین کی رونقیں بھی بحال ہوں گی، احسان مانی۔ فوٹو: فائل

---

پی ایس ایل 7پاکستان میں ہوگی، چیئرمین پی سی بی نے خوشخبری سنادی۔

ابتدائی پی ایس ایل 6 کے ابتدائی 14 میچز نیشنل اسٹیڈیم کراچی میں کھیلے گئے تھے،کورونا کیسز بڑھنے پر مارچ میں ملتوی ہونے والی لیگ کے باقی 20 میچز جون میں ابوظبی میں کھیلے گئے، ابتدا میں سامنے آنے والے ویزا اور لاجسٹک مسائل کے طویل سلسلے کے بعد بالآخر ایونٹ مکمل ہوگیا مگر شیخ زید اسٹیڈیم میں تماشائیوں کو داخلے کی اجازت نہیں دی گئی۔

چیئرمین پی سی بی احسان مانی نے کہا ہے کہ کسی بھی کھیل کی حقیقی پہچان اور جان اس کے تماشائی ہی ہوتے ہیں، بورڈ، کھلاڑیوں اور تمام کمرشل پارٹنرز نے ان کی کمی کو شدت سے محسوس کیا،شائقین کرکٹ نے پی ایس ایل 2019 کے باقی 8میچز میں بھرپور جوش و خروش کے ساتھ شرکت کرکے دنیا بھر میں پاکستان کے مثبت تشخص کو اجاگر کرنے میں اہم کردار ادا کیا، اسی اعتماد کے بھروسے سری لنکا اور بنگلادیش کی ٹیمیں ایک دہائی کے بعد ٹیسٹ کرکٹ کھیلنے کے لیے آئیں۔

انہوں نے کہا کہ پرجوش شائقین کو یقین دلانا چاہتا ہوں کہ 2022 میں شیڈول پی ایس ایل کا ساتواں ایڈیشن پاکستان میں کھیلا جائے گا اور تماشائیوں کواسٹیڈیم میں داخلے کی اجازت ہوگی، آئندہ ایونٹ کے لیے پی سی بی اپنی منصوبہ بندی کا آغاز جولائی سے ہی کردے گا، رواں سال کی آخری سہ ماہی میں اسے حتمی شکل دیدی جائے گی تاکہ پرستاروں کو ایونٹ کی تمام تر تفصیلات سے بروقت آگاہ کیا جاسکے۔

احسان مانی نے کہا کہ شائقین نے ابوظبی مرحلے میں ڈیجٹیل پلیٹ فارمز کے ذریعے لیگ، ٹیموں اور کھلاڑیوں کی بھرپور حوصلہ افزائی جاری رکھی، پی سی بی کھیل کے فروغ میں اپنے فینز اور اسپورٹرز کے تعاون اور حوصلہ افزائی کی ہمیشہ قدرکرتا ہے، آئندہ سیزن میں اپنی ساری کرکٹ پاکستان میں کھیلیں گے، امید ہے کہ شائقین انٹرنیشنل ٹیموں کا پرجوش استقبال کریں گے، نیوزی لینڈ، انگلینڈ، ویسٹ انڈیز اور آسٹریلیا کی میزبانی سے نہ صرف ملک میں کرکٹ کو فروغ ملے گا بلکہ نوجوانوں کی کھیل سے وابستگی کو بھی تقویت ملے گی۔

انھوں نے کہا کہ وہ پی سی بی کے عملے، ابوظبی اسپورٹس کونسل، امارات کرکٹ بورڈ اور ابوظہبی حکومت کے مشکور ہیں کہ انھوں نے اس ایونٹ کو کامیاب بنانے کے لیے ایک ٹیم کی طرح متحد ہوکر ہرغیرمتوقع چیلنج پر قابو پایا۔

احسان مانی نے کہا کہ وہ ایونٹ میں شریک تمام کھلاڑیوں کے مشکور ہیں جنہوں نے ایونٹ کو کامیاب بنانے کے لیے کورونا پروٹوکولز پر مکمل عمل کیا، تمام فرنچائز مالکان کا بھی شکریہ کہ انھوں نے ہر فیصلے میں پی سی بی کی مکمل حمایت کی، پی ایس ایل کی سالمیت کا ہر حال میں تحفظ کریں گے۔