بالی ووڈ کی جگمگاتی روشنیوں میں نئے ستارے دھوم مچانے کو تیار شائقین مسحور

ایشیا گپتا جنہوں نے فلمی کیرئیر کا آغاز ’’جنت ٹو‘‘ سے کیا مگر اب وہ بپاشا باسو اور عمران ہاشمی کے ساتھ ’راز تھری‘ میں جلوہ گر ہوئی ہیں. فوٹو: اے ایف پی/ فائل

---

بالی ووڈ میں آجکل راج ہے کچھ ایسے چہروں کا جن کا گلیمر اور اسٹائل دیکھنے والوں کو مسحور کیے دے رہا ہے۔

بہت سے نئے ستارے بالی ووڈ کی جگمگاتی روشنیوں میں اپنے گلیمر اور 'ہاٹ اینڈ بولڈ' پرسنالٹی سے دھوم مچانے کو تیار ہیں جن میں بولڈ فلمیں بنانے کے لیے مشہور مہیش بھٹ کی صاحبزادی عالیہ بھٹ بالی وڈ میں اپنے کیرئیر کی شروعات کرن جوہر کی فلم ' اسٹوڈنٹ آف دی ائیر' سے کر رہی ہیں۔ عالیہ کے بارے میں کہا جا رہا ہے کہ وہ جلد فلم 'دل ہے کہ مانتا نہیں' کے ری میک میں رنبیر کپور کے ساتھ نظر آئیں گی۔

ایشیا گپتا جنہوں نے فلمی کیرئیر کا آغاز ''جنت ٹو'' سے کیا مگر اب وہ بپاشا باسو اور عمران ہاشمی کے ساتھ 'راز تھری' میں جلوہ گر ہوئی ہیں۔''فرام سڈنی ود لو'' سے کیرئیر کا آغاز کرنیوالی بیدیتا بیگ شہ سرخیوں میں ہیں لیکن اس کیوجہ ان کی اداکاری یا خوبصورتی نہیں بلکہ پورن اسٹار سنی لیون پر برسنا تھا۔ اب دیکھنا یہ ہے کہ سنی لیون پر گرج برس کر خبروں میں جگہ پانے والی بیدیتا اپنی فلموں کے ذریعے باکس آفس پر کیا کمال دکھاتی ہیں۔

ڈیانا پینٹی بالی ووڈ میں انٹری دینے والے نئے چہروں میں اسوقت سب سے زیادہ کامیابی اور شہرت سمیٹنے والی اداکارہ ہیں ۔'کاک ٹیل' کی شاندار کامیابی میں دیپکا پڈکون اور سیف علی خان کے ساتھ ساتھ بڑا ہاتھ ڈیانا کی بیباک اداکاری اور بولڈ ملبوسات کا بھی ہے۔ وہ باکس آفس کے لیے ایک نئی فیورٹ کے طور پر سامنے آئی ہیں۔

بھارتی نژاد جرمن گرل ایولن شرما نے ماڈلنگ کی دنیا میں شناخت بنانے کے بعد اب فلم نگری کا رخ کر لیا ہے اور یہاں بھی ان کی کامیابی کے امکانات خاصے روشن ہیں۔ 'جسم ٹو' کی ہیروئن سنی لیون کے بارے میں اطلاعات ہیں کہ فلم کی کامیابی کے بعد سنی بالغ فلموں میں کام نہ کرنے کا فیصلہ کرنیوالی ہیں۔

شاید یہی وجہ ہے کہ انھوں نے ایکتا کپور کے ساتھ ایک نئی فلم سائن کی ہے۔ فلم 'باڈی گارڈ' سے کیرئیر شروع کرنیوالی ہیزل کیچ کے بارے میں فلمی پنڈتوں کی پیش گوئیاں یہ ہیں کہ وہ مستقبل میں بڑی اسٹار ثابت ہوں گی۔ ساوتھ سے تعلق رکھنے والی آئیلینا ڈی سوزا نے رنبیر کپور اور پریانکا چوپڑہ کی فلم 'برفی' سے دھماکے دار انٹری دی ہے اور اب وہ جلد ہی شاہد کپور کے ساتھ راج کمار سنتوشی کی آنیوالی فلم میں رومانس لڑاتی نظر آئیں گی۔فلم 'سنگھم ' میں اجے دیو گن کی ہیروئن کاجل اگروال نے مزید دو فلمیں سائن کر لی ہیں۔

ایک شاہد کپور جب کہ دوسری نیل نتن مکیش کے ساتھ ہے۔ بھٹ فیملی کی فلم ''جسم ''کے اب تک دو سیکوئل سامنے آچکے ہیں جن میں بپاشا باسو اور سنی لیون نے مرکزی کردار ادا کیے۔ اور اب ''جسم ٹو'' کا بھی سیکوئل بنانے کی تیاریاں کی جا رہی ہیں جس میں ہیروئن کا کردار نتھالیا کور نبھا رہی ہیں۔ پاولی ڈیم جن کے بارے سننے میں آ رہا تھا کہ وہ 'ہیٹ اسٹوری' کا حصہ ہیں مگر یہ خبریں غلط ثابت ہوئیں۔