بائیکیا رائیڈر سے ڈکیتی میں مزاحمت پر فائرنگ پیچھے بیٹھا مسافر قتل

شہری کے قتل میں ملوث ملزم کا خاکہ تیارکر لیا گیا۔

---

تین روزقبل راشد منہاس روڈپرڈکیتی کی واردات کے دوران مزاحمت پرشہری کے قتل میں ملوث ملزم کا خاکہ تیارکر لیا گیا۔

فیڈرل بی صنعتی ایریا کے علاقے راشد منہاس روڈ پر یو بی ایل اسپورٹس کمپلیکس کے سامنے دن دہاڑے موٹر سائیکل سوار ملزمان نے بائیکیا رائیڈر کو لوٹنے کی کوشش کی ، اس دوران رائیڈر نے مزاحمت کی تو ملزمان نے اندھا دھند فائرنگ کردی اور فرار ہوگئے۔

فائرنگ کے نتیجے میں رائیڈر کے ساتھ بیٹھا مسافر35 سالہ وقار شدید زخمی ہوگیا جسے پولیس نے موقع پر پہنچ کر ایمبولنس میں قریبی نجی اسپتال منتقل کرنے کی کوشش کی تاہم وہ اسپتال پہنچنے سے قبل ہی دم توڑ گیا، مقتول مسافر اورنگی ٹائون کا رہائشی تھا، ضلع وسطی پولیس نے مسافر کے قتل میں ملوث ملزم کا خاکہ تیار کر لیا۔

پولیس کے مطابق خاکہ عینی شاہد کی مدد سے تیار کیا گیا ہے انھوں نے بتایاکہ وقوع کے روز مسلح ملزمان موٹر سائیکل رائیڈر سے لوٹ مار کررہے تھے موٹرسائیکل کی عقبی سیٹ پر بیٹھا مسافر بھاگنے لگا تھا اورمسافر وقار کو بھاگتے دیکھ کرملزمان نے فائرنگ کردی تھی جس کے نتیجے میں مسافر زخمی ہونے کے بعد دوران علاج دم توڑ گیا۔