کرن جوہر کی ہدایت کاری میں واپسی رنویر اور عالیہ کیساتھ فلم بنانے کا اعلان

فلم کی کاسٹ میں لیجنڈری اداکار دھرمیندر، جیا بچن اور شبانہ اعظمیٰ بھی شامل ہیں

---

بالی ووڈ کے نامور فلمساز کرن جوہر نے ہدایت کاری میں 5 سال بعد واپسی کرتے ہوئے رنویر سنگھ اور عالیہ بھٹ کے ساتھ فلم بنانے کا اعلان کردیا۔

بھارتی فلمساز کرن جوہر نے سماجی رابطے کی ویب سائٹ پر ٹوئٹ کے ذریعے ایک موشن پکچر شیئر کی جس کے ذریعے انہوں نے اپنی نئی فلم کی کاسٹ کا اعلان کیا۔

https://twitter.com/karanjohar/status/1412330571036987392

کرن جوہر نے ٹوئٹ میں کہا کہ اس کاسٹ کے ذریعے یہ اسٹوری میرے دل کے مزید قریب ہوگئی ہے، ملیے میری نئی فلم کی کاسٹ اور 'راکی اینڈ رانی کی پریم کہانی' کی فیملی سے جو 2022 میں سینما گھروں کی زینت بنے گی۔

کرن جوہر نے فلم میں شامل تمام افراد کے نام ہیش ٹیگ کے ذریعے اپنی ٹوئٹ میں شیئر کیے جس میں مرکزی کردار میں رنویر سنگھ اور عالیہ بھٹ دکھائی دیں گے جب کہ فلم کی دیگر کاسٹ میں لیجنڈری اداکار دھرمیندر، جیا بچن اور شبانہ اعظمیٰ شامل ہیں۔

https://twitter.com/karanjohar/status/1412336241660497922

واضح رہے کرن جوہر نے آخری بار 2016 میں 'اے دل ہے مشکل' میں ہدایت کاری کے فرائض انجام دیے تھے جس میں رنبیر کپور، انوشکا شرما اور ایشوریا رائے نے مرکزی کردار ادا کیے تھے۔