انگلینڈ کی بائیو سیکیورٹی جھول پر پی سی بی نے آنکھیں بندکرلیں

حفیظ اور یونس کورعایت نہ دی،اچانک منتخب ٹیم سے کھیلنے کیلیے تیار۔

Abbas Raza July 07, 2021

صحت اور حفاظت کیلیے کیے جانے والے انتظامات پر مطمئن ہیں،ترجمان۔ فوٹو: فائل

انگلش بائیو سیکیورٹی میں جھول پر پی سی بی نے آنکھیں بند کرلیں۔

محمد حفیظ نے جنوبی افریقہ کیخلاف سیریز سے قبل تاخیر سے بائیو ببل جوائن کرنے کی درخواست کی تھی، حالیہ دورئہ انگلینڈ سے قبل بیٹنگ کوچ یونس خان بھی دانتوں کا علاج کرانے کے بعد لاہور آنا چاہتے تھے،دونوں کے ساتھ سختی برتتے ہوئے اسکواڈ کے ساتھ لے جانے سے ہی انکار کردیا گیا۔

دوسری جانب کورونا کیسز سامنے آنے کے بعد انگلینڈ کا پورا اسکواڈ ہی قرنطینہ میں چلا گیا، متبادل 18پلیئرز کا گذشتہ روز اعلان کیا گیا، ان سب افراد کے کورونا ٹیسٹ ہوں گے مگر بغیر کسی تاخیر کے جمعرات کو میچ کھیل سکیں گے حالانکہ پاکستان ٹیم نے بھی ڈربی پہنچ کر3روز روم آئسولیشن میں گزارے، اس کے بعد منگل تک وہیں الگ رہتے ہوئے پریکٹس سیشن کیے۔

پی سی بی کے اعلامیے میں کہا گیاکہ پیر کی شام انگلش کیمپ میں کورونا کیسز سامنے آئے،یہ خبر ملتے ہی ہم اپنے کھلاڑیوں کی صحت اور حفاظت کے پیش نظر ای سی بی کے ساتھ رابطے میں رہے، ہمیں ان کے میڈیکل پینل کی یقین دہانیوں پر اطمینان ہے، ہم اپنے کھلاڑیوں کی صحت اور حفاظت کیلیے کیے جانے والے انتظامات پر مطمئن ہے، انگلینڈ میں موجود قومی کرکٹ ٹیم کی مینجمنٹ کے ساتھ بھی مسلسل رابطہ رکھا جا رہا ہے،انھیں ہوٹل اور میچ وینیو پر مزید احتیاطی تدابیر اختیار کرنے کی ہدایت دی گئی ہے۔