برہان وانی کی آج پانچویں برسی منائی جارہی ہے

لائن آف کنٹرول کے دونوں جانب برہان وانی کا یوم شہادت منایا جا رہا ہے۔

---

مقبوضہ کشمیر میں بھارتی فورسز کے ہاتھوں شہید ہونے والے کشمیری نوجوان برہان وانی کی آج پانچویں برسی منائی جارہی ہے۔

کشمیر میڈیا سروس کے مطابق برہان مظفر وانی کی چوتھی برسی پر حریت قیادت کی کال پر آج مقبوضہ کشمیر کے کئی علاقوں میں برہان وانی کی تصاویر والے پوسٹرز لگائے گئے ہیں۔ سری نگر میں پوسٹرز کے ذریعے لوگوں سے کہا گیا ہے کہ کورونا کے باعث کشمیری اپنے اپنے علاقوں میں برہان وانی کی برسی کی مناسبت سے تقریبات کا اہتمام کریں۔

لائن آف کنٹرول کے دونوں جانب برہان وانی کا یوم شہادت منایا جا رہا ہے۔ میرپور میں ضلع کچہری سے چوک شہیداں تک ریلی نکالی گئی۔ بڑی تعداد میں کشمیری نوجوانوں کے منظم دستے نے شہداء کو خراج عقیدت پیش کرنے کیلئے مارچ کیا اور برہان وانی کو سلامی پیش کی۔ اس موقع پر بھارتی حکومت اور قابض افواج کے خلاف شدید نعرے بازی کی گئی۔ لے کے رہیں گے آزادی اور چھین کے لیں گے آزادی کے فلگ شگاف نعرے لگائے گئے۔

یہ بھی پڑھیں: فخر ہے کہ برہان نے سینے پر گولیاں کھائیں

مشعال حسین ملک نے برہان مظفر وانی کی برسی پر ویڈیو پیغام میں کہا کہ آج کا دن برہان وانی کی شہادت کا دن ہے، برہان وانی ان چند عظیم شہیدوں سے ایک ہیں جن کا انتخاب شہادت نے کیا۔

مشعال ملک کا کہنا تھا کہ برہان وانی نے آٹھ لاکھ بھارتی فوج کو نہتے للکارا، برہان وانی کی شہادت کو کئی سال گزر گئے، لیکن بھارتی فوج آج بھی خوفزدہ ہے، بھارتی فوج نے وانی کی برسی پر کرفیو لگا دیا، بھارتی فوج کشمیریوں کو گھروں میں بند رکھا ہے

مشعال ملک نے مزید کہا کہ ایک کشمیری کی شہادت لاکھوں بھارتی فوجیوں پر بھاری ہے، جنت کی حفاظت شہید کر رہے ہیں، یہ کیسے ممکن ہے فتح نصیب نہ ہو، بھارت کی غلامی کو کشمیریوں نے نہ پہلے مانا نہ اب مانے گئے، ایک دن آئے گا جب کشمیریوں کو آزادی نصیب ہو گئی۔

واضح رہے کہ 8 جولائی 2016 کو بھارتی فورسز کے ہاتھوں نوجوان برہان مظفر وانی کی شہادت نےتحریک آزادی کشمیر میں ایک نئی روح پھونک دی تھی۔