عالیہ بھٹ پریانکا چوپڑا کے نقش قدم پر چل پڑیں

عالیہ بھٹ بالی ووڈ سے نکل کر اپنے انٹرنیشنل کیریئر میں آگے بڑھنے کے لیے تیار ہیں فوٹوفائل

---

بالی ووڈ اداکارہ عالیہ بھٹ نے پریانکا چوپڑا کے نقش قدم پر چلتے ہوئے ہالی ووڈ ٹیلنٹ ایجنسی کے ساتھ معاہدہ کیا ہے۔

بھارتی میڈیا کے مطابق اداکارہ عالیہ بھٹ بالی ووڈ سے نکل کر اپنے انٹرنیشنل کیریئرمیں آگے بڑھنے کے لیے تیار ہیں۔ انہوں نے اداکارہ پریانکا چوپڑا کے نقش قدم پر چلنے کا فیصلہ کرلیا ہے اور اپنے ہالی ووڈ کے خوابوں کی طرف پہلا قدم بڑھاتے ہوئے ایک ہالی ووڈ ٹیلنٹ ایجنسی کے ساتھ معاہدہ کیا ہے۔

میڈیا رپورٹس کے مطابق عالیہ بھٹ نے ہالی ووڈ میں کام کرنے کا موقع حاصل کرنے کے لیے ایک امریکی ٹیلنٹ ایجنسی ڈبلیو ایم ای کے ساتھ معاہدے پر دستخط کیے ہیں۔

دوسری جانب عالیہ بھٹ نے حال ہی میں اپنے ہوم پروڈکشن میں بننے والی فلم ''ڈارلنگ'' کی شوٹنگ کا آغاز کیا ہے۔ اس کے علاوہ وہ بہت جلد سنجے لیلا بھنسالی کی ہدایت کاری میں بننے والی فلم ''گنگو بائی کاٹھیاواڑی'' میں مرکزی کردار ادا کرتی نظر آئیں گی۔

عالیہ بھٹ نے''گنگو بائی کاٹھیا واڑی'' میں کام کرنے کا تجربہ بیان کرتے ہوئے بتایا کہ ہم نے اس فلم کی شوٹنگ 8 دسمبر 2019 کو شروع کی تھی اور فلم کی شوٹنگ ختم ہونے میں 2 سال لگ گئے۔ اس فلم کے سیٹ نے دو بار لاک ڈاؤن اور دو طوفان دیکھے، فلم کے ہدایت کار اور فنکاروں کو کورونا ہوا جس کی وجہ سے شوٹنگ کئی بار روکنی پڑی لیکن اس کے باوجود میں نے اس فلم سے بہت کچھ سیکھا۔

واضح رہے کہ اداکارہ پریانکا چوپڑا ہالی ووڈ میں کئی پراجیکٹس میں کام کرچکی ہیں جن میں ڈراما ''کوانٹیکو''، فلم ''بے واچ'' اور ''دی وہائٹ ٹائیگر'' شامل ہیں۔