اوباما کا پوتن کو فون سوچی اولمپک کیلیے سیکیورٹی تعاون کی پیشکش

سرمائی کھیلوں کے دوران2امریکی جنگی جہاز بحیرہ اسود میں تعینات کر سکتے ہیں، ترجمان وائٹ ہائوس۔ فوٹو: فائل

---

امریکی صدربارک اوباما نے اپنے روسی ہم منصب ولادی میرپوتن کو فون کیا اور ان سے شام کی صورتحال پرہونیوالے جنیوا مذاکرات پر تبادلہ خیال کے علاوہ سوچی اولمپک کو محفوط بنانے کیلیے سیکیورٹی تعاون کی پیشکش کردی۔

غیرملکی خبر رساں ادارے کے مطابق اوباما نے شام کی صورتحال پر جنیوا میں ہونے والے مذاکرات پر روسی صدر سے بات چیت کی اور داغستان کے علیحدگی پسندوں کی جانب سے سوچی شہر میں ہونے والے سرمائی کھیلوں کے دوران حملے کی دھمکی کے بعد امریکی صدر نے روسی صدر ولادی میر پوتن کو تعاون کی پیشکش کی ہے۔



وائٹ ہائوس کے ترجمان کا کہنا تھا کہ امریکا روس کو سرمائی کھیلوں کے دوران فضائی اور سمندری امداد دینے پر تیار ہے، ترجمان کے مطابق روس چاہے تو امریکا کے 2 جنگی جہاز کھیلوں کے دوران بحیرہ اسود میں تعینات کیے جا سکتے ہیں، امریکی ترجمان کے مطابق اس حوالے سے روسی درخواست کا انتظار کیا جائے گا۔