پارلیمنٹ ہاؤس کے باہر مشکوک شخص اسلحے سمیت گرفتار

ملزم کے قبضے سے پسٹل برآمد ہوا ہے، پولیس حکام۔ فوٹو: آن لائن

---

پارلیمنٹ ہاوس کے باہر سے مشکوک شخص کو گرفتارکیا گیا جس سے پستول برآمد ہوا ہے۔

ایکسپریس نیوز کے مطابق ملک کی انتہائی حساس عمارت پارلیمنٹ ہاؤس کے باہر سے ایک مشکوک شخص کو گرفتار کیا گیا ہے، جس کے قبضے سے پستول بھی برآمد ہوا ہے۔

پولیس کے مطابق مشکوک شخص بہت دیر تک اسلحے سمیت پارلیمنٹ ہاؤس کے ارد گرد منڈلا رہا تھا، تاہم کسی بھی نقصان کے خدشے کے پیش نظر اسے حکمت عملی کے تحت دیر سے گرفتار کیا گیا، ملزم کے قبضے سے پسٹل برآمد ہوا ہے اور ملزم کو تھانہ سیکرٹریٹ منتقل کر دیا گیا ہے، جہاں تفتیش جاری ہے۔

پولیس حکام نے بتایا کہ اسلحہ لہرانے والے شخص کی شناخت ملک سہیل کے نام سے ہوئی ہے، اور وہ چکری کا رہائشی ہے، جب کہ ملزم کی عمر 45 سال ہے، بظاہر اس کا دماغی توازن درست نہیں ہے، تاہم پولیس اس کا ریکارڈ چیک کر رہی ہے۔

واضح رہے کہ پارلیمنٹ ہاؤس کے باہر گھومنے والے اسلحہ بردار مشکوک شخص کی ویڈیو بھی سوشل میڈیا پر وائرل ہوئی ہے جس میں واضح طور پر دیکھا جاسکتا ہے کہ شلوار قمیض میں ملبوس منہ پر ڈھاتا باندھے مشکوک شخص ایک ہاتھ میں پسٹل اور دوسرے ہاتھ آہنی شے لئے دیدہ دلیری کے ساتھ سڑکوں پر مٹر گشت کررہا ہے، جب کہ پولیس اہلکار کسی بھی کارروائی سے گریز کرتے ہوئے اس پر کڑی نظر رکھے ہوئے ہیں۔