ماڈل قتل کیس نایاب کے مبینہ قاتل کی سی سی ٹی وی فوٹیج سامنے آگئی

نایاب کے قتل ہونے کے بعد صبح 5 بجکر 26 منٹ پر اس کے گھر کے قریب سے ایک مشکوک شخص گزر رہا ہے۔ فوٹو:سوشل میڈیا

---

ماڈل نایاب کے مبینہ قاتل کی سی سی ٹی وی فوٹیج سامنے آگئی۔

ایکسپریس نیوز کے مطابق لاہور کے علاقے ڈیفنس بی میں قتل ہونے والی ماڈل نایاب کے مبینہ قاتل کی سی سی ٹی وی فوٹیج سامنے آگئی، پولیس ذرائع کا کہنا ہے کہ سی سی ٹی وی فوٹیج میں نظر آنے والا مشکوک شخص ہی نایاب کا قاتل ہو سکتا ہے۔

سی سی ٹی وی فوٹیج میں واضح طور پر دیکھا جاسکتا ہے کہ ماڈل نایاب کے قتل ہونے کے بعد صبح 5 بجکر 26 منٹ پر اس کے گھر کے قریب سے ایک مشکوک شخص گزر رہا ہے، فوٹیج میں نظر آنے والا تقریباً 30 سالہ مشکوک شخص گندمی رنگ کا ہے، جو شرٹ اور ٹراؤزر میں ملبوس ہے اور ٹوپی (کیپ) پہن رکھی ہے، اور اس نے ہاتھ میں کچھ پکڑ رکھا ہے۔

اس خبرکوبھی پڑھیں: لاہور میں 26 سالہ ماڈل کی برہنہ حالت میں لاش برآمد

ذرائع کا کہنا ہے کہ قتل کیس کے تفتیش کار فوٹیج کے ذریعے مشکوک شخص کو ٹریس کرنے کی کوششوں میں مصروف ہیں، اور گھر میں موجود ممکنہ گمشدہ زیورات کی تفصیل اکھٹی کر رہے ہیں، جب کہ سی سی ٹی وی فوٹیج کو فرانزک لیب بھجوا کر مشکوک شخص کا چہرہ صاف کرکے تصویر حاصل کی جائے گی۔

دوسری جانب ماڈل نایاب کی تفتیش میں ایک اور اہم پیشرفت سامنے آئی ہے، اور پولیس نے نایاب سے رابطے میں رہنے والے 10 افراد کو شامل تفتیش کرلیا ہے، جب کہ ماڈل کے سوتیلے بھائی کو پہلے ہی شامل تفتیش کیا جا چکا ہے۔

ایس ایس پی انوسٹی گیشن منصور انور کا کہنا ہے کہ پولیس نے شامل تفتیش کئے گئے تمام افراد کے بیانات قلمبند کرلئے ہیں، ان سے مقتولہ نایاب کے ساتھ تعلقات اور آخری ملاقات کے حوالے سے سوالات پوچھے گئے ہیں، جب کہ فارم ہاؤس میں ہونے والی لڑائی سے متعلق بھی پوچھ گچھ کی گئی ہے، اور مقتولہ نایاب کی ذاتی زندگی اور رہن سہن سے متعلق بھی سوالات کئے گئے ہیں۔ پولیس نے نایاب کےموبائل فون کی تفصیلات حاصل کرلیں تھیں اور شامل تفتیش افراد کا تعین نایاب کے موبائل ڈیٹا سے حاصل کیا گیا۔

ایس ایس پی انوسٹی گیشن نے بتایا کہ نایاب کے گھرکی عقبی کھڑکی کی جالی ٹوتی ہوئی ملی ہے، کھڑکی کے قریب لگے انسانی ہاتھوں کے نمونے فرانزک کیلئے بھجوا دیے ہیں، شبہ ہے کہ قاتل نے فرار ہونے کے لیے کھڑکی کا راستہ استعمال کیا، نایاب کےگھر کی الماریوں میں اس کی چیزیں بکھری ہوئیں تھیں، جب کہ ماڈل نایاب کی برہنہ حالت میں تشدد زدہ لاش ملی تھی۔

کیس کا پس منظر

11 جولائی اتوار کے روز لاہور کے علاقے ڈیفنس بی میں واقع ایک گھر سے ماڈل کی برہنہ حالت میں لاش برآمد ہوئی تھی، پولیس کے مطابق مقتولہ نایاب کے بھائی محمد علی نے رپورٹ درج کرائی کہ نایاب گھر میں اکیلی رہتی تھی، وہ بہن کے گھر گیا تو بہن کی لاش زمین پر پڑی ہوئی تھی، جبکہ اس کے باتھ روم کی جالی ٹوٹی ہوئی تھی، اور مقتولہ کے گلے پر زخم کے نشان تھے۔

پولیس حکام نے بتایا کہ مقتولہ کی شناخت 26 سالہ نایاب سے ہوئی ہے، جو ماڈلنگ کرتی تھی اور غیرشادی شدہ تھی، جب کہ اس کے دو سوتیلے بھائی ہیں۔ ماڈل کے سوتیلے بھائی کی مدعیت میں قتل کا مقدمہ درج کر لیا گیا ہے، اور ابتدائی معلومات میں مقتولہ کو نامعلوم ملزمان نے تشدد کر کے گلا دبا کر موت کے گھاٹ اتارا۔