جامشورو سے کراچی آکر چرس بیچنے والے 6 سی آئی اے اہل کار گرفتار

اہلکار سرکاری موبائل اور پولیس وردی میں تھے، رینجرز نے روک کر تلاشی لی تو 76 کلو گرام چرس برآمد ہوئی، مقدمہ درج

Staff Reporter July 18, 2021

اہلکار سرکاری موبائل اور پولیس وردی میں تھے، رینجرز نے روک کر تلاشی لی تو 76 کلو گرام چرس برآمد ہوئی، مقدمہ درج (فوٹو : فائل)

رینجرز نے شیریں جناح کالونی میں موجو جامشورو سی آئی اے کے 6 اہل کار گرفتار کرلیے، ملزمان سرکاری موبائل میں پولیس یونیفارم پہن کر 76 کلو گرام چرس فروخت کرنے کراچی آئے تھے جن کے خلاف مقدمہ بھی درج کرلیا گیا۔

ایس ایچ او بوٹ بیسن انسپکٹر نصیر تنولی کے مطابق اتوار کو رینجرز نے شیریں جناح کالونی میں کارروائی کرتے ہوئے جامشورو سی آئی اے کے چھ اہل کاروں کو گرفتار کرکے ان کے قبضے سے 76 کلوگرام چرس برآمد کرلی۔ پولیس نے واقعے کا مقدمہ الزام نمبر 587/21 بجرم دفعہ 6/9 سی نارکوٹکس کے تحت سرکاری مدعیت میں درج کرلیا۔

ایس ایچ او کا کہنا ہے کہ ملزمان ایک پولیس موبائل نمبر ایس پی ایف 689 میں سوار تھے جن میں چار اہلکار باوردی اور دو سادہ لباس تھے، جب رینجرز کے اہل کاروں نے روکی گئی موبائل کی تلاشی لی تو اس میں سے بیس پیکٹ میں پیک کی گئی اعلیٰ کوالٹی کی چرس برآمد ہوئی۔

مقدمے میں 6 اہل کار یعقوب، غلام عباس، اعجاز علی ملاح، عبدالحمید، راہب حسین اور احمد نواز کو نامزد کیا گیا ہے، ملزمان سے برآمد ہونے والی چرس کی مقدار 76 کلو گرام ہے۔

پولیس حکام کے مطابق ملزمان جامشورو سی آئی اے کے اہل کار ہیں اور 76 کلو گرام چرس فروخت کرنے کے لیے کراچی کے علاقے شیریں جناح کالونی آئے تھے کہ انھیں گرفتار کرلیا گیا، واقعے کے بعد جامشورو میں واقع سی آئی اے سینٹر کو سیل کردیا گیا۔

ایس ایچ او بوٹ بیسن نصیر تنولی نے مزید بتایا کہ مذکورہ تمام اہل کار جامشورو سی آئی اے کے انسپکٹر نثار بھٹی کی پولیس پارٹی میں شامل ہیں اور انسپکٹر کے خلاف جامشورو میں بھی انکوائری کی جارہی ہے کہ ان کی پارٹی میں شامل اہل کار کس طرح کراچی میں منشیات فروخت کرنے پہنچ گئے؟

انھوں نے مزید بتایا کہ واقعے کے بعد کراچی اور جامشورو میں بڑے پیمانے پر تحقیقات کا آغاز کردیا گیا ہے۔