راولپنڈی میں ماں کو تشدد کا نشانہ بنانے والا بد بخت بیٹا گرفتار

بیٹے نے پیسے نہ دینے پر مجھے تھپڑوں، مکوں اور لاتوں سے مارا پیٹا، اور سنگین نتائج کی دھمکیاں دیں، ماں کا بیان۔ فوٹو:ایکسپریس

---

پیسے نہ ملنے پر ماں پر تھپڑ، مکوں اورلاتوں سے تشدد کرنے کرنے والا ناخلف بیٹا پولیس نے گرفتار کرلیا۔

ایکسپریس نیوز کے مطابق راولپنڈی کے تھانہ صادق آباد کی حدود بہاری کالونی میں بدبخت بیٹے نے پیسے نہ ملنے پر ماں پر تھپڑ، مکوں اور لاتوں سے تشدد کیا، جب کہ پولیس نے پروٹیکشن آف پیرنٹس آرڈنینس کے تحت مقدمہ درج کرکے ناخلف بیٹے کو گرفتار کرلیا۔

مسماتہ نورین بی بی نے پولیس کو بیان دیا کہ خاوند روزگار کے لیے بیرون ملک ہے، اور میرے تین بیٹے ہیں، منجھلا بیٹاعلی میرے ساتھ لڑائی جھگڑا کرتا رہتا ہے اور پیسے مانگتا ہے، پیسے نہ دینے پر گھر کی چیزیں توڑ دینا اور مجھے جان سے مارنے کی دھمکیاں دینا اس کا روز کا معمول ہے، آج پھر اس نے ہنگامہ کیا اور مجھے تھپڑوں، مکوں اور لاتوں سے مارا پیٹا، اور سنگین نتائج کی دھمکیاں دیں۔

نورین بی بی کے مطابق اس کے بڑے بیٹے نے اس کی جان چھڑائی ہے، مجھے علی سے جان کا خطرہ ہے، میرے بیٹے کے خلاف قانونی کارروائی کی جائے۔

دوسری جانب پولیس ترجمان کا کہنا ہے کہ سوشل میڈیا پر ناخلف بیٹے کی اپنی والدہ پر تشدد کی شکایت سامنے آئی جس پر تھانہ صادق آباد پولیس نے متاثرہ خاتون سے خود رابطہ کیا اور خاتون کی شکایت پر مقدمہ درج کر کے والدہ پر تشدد جیسے شرمناک فعل میں ملوث ملزم علی کو گرفتار کر لیا ہے۔ ملزم کے خلاف مقدمہ پروٹیکشن آف پیرنٹس آرڈیننس 2021 اور تعزیرات پاکستان کی دفعات کے تحت درج کیا گیا ہے۔

ایس پی راول ڈویژن ضیاء الدین کا کہنا تھا کہ ماں جیسی عظیم ہستی پر تشدد نا قابل تصور اور افسوس ناک اقدام ہے، ملزم کسی رعایت کا مستحق نہیں ملزم کو ٹھوس شواہد کے ساتھ چالان کیا جائے گا۔