سندھ کی تقسیم کے بیان پر قوم پرستوں کی صوبے کے مختلف شہروں میں ہڑتال کی گئی

ہڑتال کے پیش نظر مختلف شہروں میں سیکیورٹی کے سخت انتظامات کئے گئے تھے۔ فوٹو: فائل

---

متحدہ قومی موومنٹ کے قائد الطاف حسین کے سندھ کی تقسیم سے متعلق بیان کےخلاف سکھر، لاڑکانہ اور نواب شاہ سمیت اندورن سندھ میں مکمل جب کہ حیدرآباد میں جزوی ہڑتال کی گئی۔

ایکسپریس نیوز کے مطابق جئے سندھ متحدہ محاذ (جسمم) کی جانب سے ہڑتال کی کال پر سکھر کے شاہی بازار، صرافہ بازار اور گھنٹہ گھر چوک سمیت بیشتر علاقوں ميں کاروباری مراکز بند رہے جب کہ لاڑکانہ ڈویژن، نوابشاہ، دولت پور، سکرنڈ، قاضی احمد، ٹنڈو محمد خان، ماتلی، سہون، بھان سعید آباد، جامشورو، کوٹری اور بدین میں بھی کاروبار زندگی مکمل طور پر بند رہا۔

ادھر حیدر آباد اور مٹیاری میں بھی جزوی ہڑتال کی گئی، ہڑتال کے پیش نظر مخلتف شہروں میں سیکیورٹی کے سخت انتظامات کئے گئے تھے، سڑکوں پر ٹریفک معمول سے کم رہا جب کہ پیٹرول پمپس اور سی این جی اسٹیشنز بھی پوری طرح بند رہے، ہڑتال کے باعث دفاتر اور اسکولوں ميں بھی طلبہ کی حاضری نہ ہونے کے برابر تھی۔

واضح رہے کہ 5 جنوری کو کراچی میں جلسے سے ٹیلی فونک خطاب کرتے ہوئے ایم کیو ایم کے قائد الطاف حسین نے کہا تھا کہ اگر پاکستان پیپلز پارٹی کو سندھ کی شہری آبادی قبول نہیں اور شہری آبادی کے حقوق نہیں دیئے جاتے تو شہریوں کے لئے ایک الگ صوبہ بنادیا جائے۔