او آئی سی کے انسانی حقوق کمیشن کا لائن آف کنٹرول کا دورہ

او آئی سی وفد نے فائر بندی کی خلاف ورزی سے متاثرہ افراد، دیہی دفاعی کمیٹیوں اور شہری انتظامیہ سے بھی ملاقاتیں کیں (فوٹو : فائل)

---

او آئی سی کے آزاد مستقل انسانی حقوق کمیشن کے وفد نے لائن آف کنٹرول کا دورہ کیا۔

آئی ایس پی آر کے مطابق او آئی سی کے آزاد مستقل انسانی حقوق کمیشن کے وفد نے لائن آف کنٹرول کا دورہ کیا۔ چری کوٹ سیکٹر پہنچنے پر وفد کو سیکیورٹی صورتحال پر جامع بریفنگ دی گئی۔ وفد کو شہری آبادی کے تحفظ کے لیے کیے گئے اقدامات سے بھی آگاہ کیا گیا۔

وفد کو دشمن کی فائرنگ سے آبادی کے تحفظ کے لیے بنکرز کی تعمیر کے بارے میں بھی بتایا گیا، اس بابت آئی ایس پی آر کا کہنا ہے کہ او آئی سی کے وفد نے فائر بندی کی خلاف ورزی سے متاثرہ افراد، دیہی دفاعی کمیٹیوں اور شہری انتظامیہ سے بھی ملاقاتیں کیں۔

او آئی سی وفد نے زمینی حقائق سے آگہی میں تعاون فراہم کرنے پر پاک فوج کا شکریہ ادا کرتے ہوئے کہا کہ اس دورے سے لائن آف کنٹرول پر صورت حال کا حقیقی ادراک کرنے میں بہت مدد ملی۔