برطانوی شہزادے اینڈریو پر امریکی خاتون کا ہراسانی کا الزام

شہزادہ اینڈریو کے ساتھ جنسی تعلقات قائم کرنے کے لیے مجھ سے اس وقت زبردستی کی گئی جب میں بالغ نہیں تھی،خاتون کا الزام

ویب ڈیسک August 10, 2021

شہزادہ اینڈریو نے ورجینا جوفری کے ساتھ جنسی تعلقات ہونے کے الزامات کی تردید کی ہے فوٹو: فائل

امریکی خاتون نے برطانوی شہزادے اینڈریو پر جنسی ہراسانی کا الزام لگایا ہے۔

غیر ملکی خبر ایجنسی کے مطابق ورجنیا جوفری نامی امریکی خاتون نے نیویارک کی عدالت میں برطانوی شہزادے اینڈریو کے خلاف جنسی ہراسانی کا مقدمہ دائر کردیا ہے۔ شہزادہ اینڈریو کے خلاف چائلڈ وکٹمز ایکٹ کے تحت مقدمہ درج کروایا گیا ہے۔

ورجنیا جوفری کا کہنا تھا کہ 20 سال قبل جب ان کی عمر 18 سال سے کم تھی اس وقت انہیں امریکا کے مالیاتی شعبے میں کام کرنے والے جیفری ایپسٹائن نے کئی مرتبہ جنسی ہراسانی کا نشانہ بنایا اور انہیں رقم کے عوض بااثر شخصیات سے جنسی تعلقات قائم کرنے کے لیے بھیجا۔ ان میں سےایک شہزادہ اینڈریو بھی تھے، شہزادہ اینڈریو انہیں لندن میں گیلین میکس ویل نامی خاتون کے گھر میں جنسی زیادتی کا نشانہ بناتے تھے۔ تینوں افراد نے شہزادہ اینڈریو کے ساتھ جنسی تعلقات قائم کرنے کے لیے ان کے ساتھ زبردستی کی۔

دوسری جانب شہزادہ اینڈریو نے ورجینا جوفری کے ساتھ جنسی تعلقات ہونے کے الزامات کی تردید کرتے ہوئے کہا ہے کہ وہ نہیں جانتے کہ اُن سے کب ملے تھے۔

واضح رہے کہ امریکی مالیاتی شعبے سے تعلق رکھنے والے جیفری ایپسٹائن کے دنیا بھر سے بااثر ترین شخصیات کے ساتھ انتہائی گہرے تعلقات تھے، ان میں سابق امریکی صدر بل کلنٹن اور مائیکرو سافٹ کے بانی بل گیٹس بھی شامل تھے۔ ان پر کمسن بچیوں کو بااثر شخصیات کے پاس بھیجنے کا الزام تھا ، اس نے جیل میں خودکشی کرلی تھی۔