ترکی میں روسی فوج کا فائر فائٹر طیارہ گر کر تباہ 8 افراد ہلاک

طیارے میں پائلٹ سمیت 5 روسی فوج کے اہلکار اور 3 ترک شہری سوار تھے

ویب ڈیسک August 14, 2021

طیارہ ترکی کے جنگلات میں لگی آگ کو بجھانے کے آپریشن میں شامل تھا، فوٹو: فائل

ترکی کے جنگلات میں لگی آگ کو بجھانے کے آپریشن کے دوران روسی فوج کا فائر فائٹنگ طیارہ گر کر تباہ ہوگیا۔

عالمی خبر رساں ادارے کے مطابق روس کا فائر فائٹنگ طیارہ Be-200 ترکی کے جنگلات میں آگ بجھانے کے آپریشن کے دوران گر کر تباہ ہوگیا جس کے نتیجے میں پائلٹ سمیت 8 افراد ہلاک ہوگئے۔

طیارے میں پائلٹ سمیت روسی فوج کے 5 اہلکار اور 3 ترکی شہری موجود تھے۔ ترکی شہری جنگلات میں لگی آگ کی نشاندہی کے لیے روسی عملے کی مدد کر رہے تھے۔ روسی فوج کے مطابق طیارہ جنوبی ساحلی علاقے میں گر کر تباہ ہوا۔

تاحال طیارہ گرنے کی وجہ کا تعین نہیں کیا جا سکا ہے۔ روسی فوج اور ترک حکومت نے حادثے کی تحقیقات کا اعلان کیا ہے۔ حادثے میں ہلاک ہونے والوں کی شناخت ظاہر نہیں کی گئی ہے۔

ترکی وزارت دفاع کے ترجمان کا کہنا ہے کہ حادثے کے شکار طیارے سے لاشیں نکالنے کے لیے ریسکیو آپریشن کا آغاز کردیا گیا ہے جس میں ایک ملٹری طیارہ اور ہیلی کاپٹر استعمال کیا جارہا ہے۔

واضح رہے کہ ترکی کے جنگلات میں دو ہفتے سے خوفناک آگ تیزی سے پھیل رہی ہے اور اب تک 250 مقامات پر آگ بجھائی جا چکی ہے جس کے لیے غیر ملکی طیاروں اور ہیلی کاپٹرز کی مدد لی جارہی ہے۔