طالبان کابل کے صدارتی محل پر قابض عام معافی کا اعلان

صدارتی محل سے جاری بیان میں کہا گیا ہے کہ حکومت اور طالبان کے ساتھ تعاون کرنے والوں کو عام معافی دی جائے گی

ویب ڈیسک August 15, 2021

کابل میں واقع صدارتی محل میں داخل ہونے کے بعد طالبان کی اولین تصاویر اور ویڈیو جاری۔ فوٹو: بشکریہ الجزیرہ

لاہور: افغانستان کی لمحہ لمحہ بدلتی صورتحال میں ایک اہم پیش رفت ہوئی ہے جس میں طالبان کےمسلح کمانڈر نے کابل میں واقع صدارتی محل پر قبضہ کرلیا ہے جہاں سے بعض تصاویر اور ویڈیو جاری کی گئی ہیں۔

یہ قبضہ افغانستان کے سابق صدر اشرف غنی کے فرار کے چند گھنٹوں بعد ہوا ہے جبکہ طالبان نے کہا ہے کہ حکومت اور فوج کے ساتھ تعاون کرنے والوں کو عام معافی دی جائے گی اور انہیں کچھ نہیں کہا جائے گا۔

سابق صدر افغانستان اشرف غنی کے ملک فرار ہونے کے چند گھنٹوں بعد ہی طالبان نے کابل میں واقع صدارتی محل پر قبضہ کرلیا ہے۔ اس سے قبل طالبان نے جلال آباد اور مزار شریف کو فتح کرنے کے بعد کابل کا گھیراؤ کرلیا تھا جس پر صدر اشرف غنی ملک چھوڑ کر تاجکستان چلے گئے تاہم صدارتی محل میں اب بھی اقتدار کی پُرامن منتقلی کے لیے طالبان اور کابل حکومت سے مذاکرات کا سلسلہ جاری ہے۔

تاہم مزاکرات میں شامل افغان رہنما عبداللہ عبداللہ نے کہا ہے کہ ' اس موقع پر سابق صدر افغانستان عوام کو چھوڑ کر چلے گئے ہیں۔'

عالمی خبر رساں ادارے کے مطابق صدارتی محل میں جاری مذاکرات کے بعد صدر اشرف غنی اہل خانہ اور ساتھیوں سمیت ملک چھوڑ کر تاجکستان چلے گئے جب کہ عبوری حکومت کے لیے سابق وزیر داخلہ احمد علی جلالی کے نام پر غور کیا جا رہا ہے۔

افغانستان کی قومی مصالحتی کمیشن کے سربراہ عبداللہ عبداللہ نے سماجی رابطے کی ویب سائٹ پر اپنے ویڈیو پیغام میں صدر اشرف غنی کے ملک چھوڑ کر جانے کی تصدیق کرتے ہوئے کہا ہے کہ اللہ ان سے حساب لے گا۔

ادھر ترجمان طالبان ذبیح اللہ مجاہد نے کہا کہ ہم نے اپنے جنگجوؤں کو کابل میں داخل ہونے کی اجازت دیدی ہے کیوں کہ افغان فوج اور پولیس کئی مقامات سے چلے گئے ہیں اور دارالحکومت میں لوٹ مار کا خدشہ پیدا ہوگیا ہے اس لیے طالبان جنگجو کابل کی سیکیورٹی سنبھال لیں گے۔

افغانستان کے قائم مقام وزیر دفاع نے کا کہنا ہے کہ صدر اشرف غنی طالبان کے ساتھ مذاکرات اور تنازع کے سیاسی حل کے لیے تمام اختیارات سیاسی قیادت کو سونپ کر گئے ہیں۔

My message to the people of AFGHANISNAN, to the security forces and to the Taliban: https://t.co/MiFk0zaNRJ
— Dr. Abdullah Abdullah (@DrabdullahCE) August 15, 2021

افغانستان کے قائم مقام وزیر داخلہ عبدالستار مرزاکوال کے مطابق ابتدا میں ہی طالبان اور حکومت کے درمیان طے پا گیا تھا کہ طالبان کابل پر حملہ نہیں کریں گے جس کے جواب میں کابل حکومت اقتدار عبوری حکومت کو منتقل کردے گی۔

We watch in complete shock as Taliban takes control of Afghanistan. I am deeply worried about women, minorities and human rights advocates. Global, regional and local powers must call for an immediate ceasefire, provide urgent humanitarian aid and protect refugees and civilians.
— Malala Yousafzai (@Malala) August 15, 2021

قبل ازیں طالبان کابل کے داخلی دروازوں پر کھڑے تھے اور اپنے امیر کے احکامات کے منتظر تھے۔ افغان فوج کی جانب سے مزاحمت نہیں کی گئی اور کابل حکومت بھی مذاکرات پر آمادہ نظر آتی ہے۔ ملا عبدالغنی برادر سمیت اہم طالبان رہنما کابل پہنچ گئے۔

اقتدار کی پُرامن منتقلی کے لیے طالبان اور کابل حکومت کے درمیان مذاکرات

صدر اشرف غنی کی تاجکستان روانگی سے قبل طالبان وفد اقتدار کی پُرامن منتقلی کے لیے افغان صدارتی محل میں داخل ہوگئے تھے جہاں طالبان اور کابل حکومت کے درمیان مذاکرات جاری ہیں۔

Peace 🤲🏻🤲🏻🤲🏻🇦🇫🇦🇫🇦🇫
— Rashid Khan (@rashidkhan_19) August 15, 2021

افغان میڈیا نے دعویٰ کیا ہے کہ صدارتی محل میں طالبان اور کابل حکومت کے درمیان مذاکرات میں کابل پر حملہ نہ کرنے اور اقتدار کی پُرامن منتقلی پر اتفاق کرلیا گیا ہے جس کے تحت عبوری حکومت قائم کی جائے گی جس کے سربراہ سابق وزیرداخلہ علی احمد جلالی ہوں گے۔

دوسری جانب افغانستان کے نائب صدر امر اللہ نے اپنی ٹوئٹ میں کہا کہ میں کسی بھی صورت طالبان کے سامنے نہیں جھکوں گا۔ میں اپنے ہیرو،کمانڈر اور رہنما احمد شاہ مسعود کی روح سے بے وفائی نہیں کروں گا۔ میں طالبان کے ساتھ کبھی ایک چھت کے نیچے نہیں بیٹھوں گا۔ کبھی بھی نہیں۔'

I will never, ever & under no circumstances bow to d Talib terrorists. I will never betray d soul & legacy of my hero Ahmad Shah Masoud, the commander, the legend & the guide. I won't dis-appoint millions who listened to me. I will never be under one ceiling with Taliban. NEVER.
— Amrullah Saleh (@AmrullahSaleh2) August 15, 2021

افغان صدر اشرف غنی کے نائب اورقومی مصالحتی کونسل کے سربراہ عبداللہ عبداللہ صدارتی محل میں ہونے والے مذاکرات میں کلیدی کردار ادا کر رہے ہیں جب کہ اطلاعات ہیں کہ سابق افغان وزیرداخلہ علی احمد الجلالی کو عبوری حکومت کا سربراہ بنایا جانے کا امکان ہے۔

یہ خبر پڑھیں : افغان صدر کا مستعفی ہوکر اہل خانہ سمیت بیرون ملک منتقل ہونے کا فیصلہ، بھارتی میڈیا

طالبان کا عام معافی کا اعلان

افغانستان میں ترجمان طالبان نے اعلان کیا ہے کہ وہ دارالحکومت کو طاقت کے ذریعے فتح کرنے کا منصوبہ نہیں رکھتے اور نہ ہی کسی سے انتقام لیں گے۔ ہمارے جنگجو کابل کے داخلی دروازوں پر کھڑے ہیں اور پُر امن طریقے سے داخل ہونا چاہتے ہیں۔

دوسری جانب دوحہ میں طالبان کے ترجمان کا بھی یہی کہنا ہے کہ کابل میں داخل ہونے والے جنگجوؤں کو تشدد سے گریز کا حکم دیا گیا ہے جب کہ جو بھی مخالف لڑائی کے بجائے امن پر آمادہ ہو انھیں جانے دیا جائے گا اور خواتین سے محفوظ علاقوں میں جانے کی درخواست کی ہے۔

بغیر کسی مزاحمت کے کابل فتح کیا

عینی شاہدین نے عالمی میڈیا کو بتایا کہ دارالحکومت میں طالبان جنگجوؤں کو بہت ہی معمولی مزاحمت کا سامنا رہا ہے۔ کابل یونیورسٹی آج صبح ہی خالی کردی گئی تھی اور تمام طالبات گھروں کو جا چکی ہیں۔ عوام گھروں میں محصور ہوگئے ہیں۔

یہ خبر بھی پڑھیں : طالبان نے اشرف غنی کے مضبوط گڑھ مزار شریف اور جلال آباد پر قبضہ کرلیا

کابل حکومت کا ردعمل اور زمینی حقائق

کابل حکومت نے اس تمام صورت حال پر مکمل خاموشی اختیار کر رکھی ہے تاہم صدر اشرف غنی کے چیف آف اسٹاف نے ٹویٹر پر کابل کے لوگوں پر زور دیا ہے کہ براہ کرم فکر نہ کریں۔ کوئی مسئلہ نہیں ہے. کابل کی صورتحال کنٹرول میں ہے تاہم تین افغان حکام نے ایسوسی ایٹڈ پریس کو بتایا کہ جنگجو دارالحکومت کے کالکان ، قرا باغ اور پغمان اضلاع میں موجود ہیں۔

Pak press section in Kabul has received hundreds of visa applications from International media to facilitate their evacuation from Kabul a special cell has been created to facilitate international media personnel’s...our prayers for peace n stability in Afghanistan
— Ch Fawad Hussain (@fawadchaudhry) August 15, 2021

امریکی اور برطانوی سفارت کاروں کا انخلا

دوسری جانب امریکی حکام نے بتایا کہ سفارت کاروں کو سفارت خانہ سے قلعہ بند وزیر اکبر خان میں واقع ہوائی اڈے پر لے جایا جا رہا یے جب کہ مزید امریکی فوجی انخلاء میں مدد کے لیے بھیجے جا رہے ہیں۔

ادھر برطانوی سفارت کاروں اور برطانوی فوج کے لیے مترجم کا کام انجام دینے والے افغان شہریوں کی منتقلی کا عمل بھی جاری ہے۔ وزیر اعظم بورس جانسن کی ہدایت پر برطانوی فوج ان افراد کو لینے پہنچ گئی ہے۔

افغانستان کو دہشتگردی کا میدان نہیں بننے دیں گے، وزیرِ اعظم برطانیہ

کچھ دیر قبل برطانوی وزیرِ اعظم بورِس جانسن نے ہنگامی کوبرا میٹنگ کے بعد کہا ہے کہ افغانستان کو دہشتگردی کے لئے معاون میدان بننے سے روکنا ہوگا کیونکہ کوئی بھی ایسا نہیں چاہتا۔ انہوں نے کہا کہ 'ہم خیال قوتیں' جمع ہوں اور مل کر اس بات کو یقینی بنائیں کہ کسی معاہدے کے بغیر نئی حکومت کو تسلیم نہ کیا جائے۔

اس کے بعد انہوں نے کہا کہ افغانستان کی صورتحال پر بدھ کے روز پارلیمنٹ کا اجلاس بلایا گیا ہے جو اس بدلتی ہوئی صورتحال پر غور کرے گا۔ انہوں نے کابل کی صورتحال کو ' انتہائی مشکل اور پیچیدہ ' قرار دیتے ہوئے مزید مشکل ہونے کا اظہار بھی کیا ہے۔

یہ بھی پڑھیں : افغان جنگ امریکا کے پانچویں صدر تک منتقل نہیں ہونے دوں گا، جو بائیڈن

واضح رہے کہ طالبان اس سے قبل اہم شہر جلال آباد اور مزار شریف پر قبضہ کر چکے ہیں اور طور خم بارڈر تک کنٹرول حاصل کرچکے ہیں۔ صرف کابل ایسا شہر باقی بچا تھا جہاں طالبان کی عمل داری قائم نہیں ہوسکی تھی۔