طالبان نے کابل ہوائی اڈےجانے والے تمام راستے بند کردیے

طالبان کی جانب سے ملک سے فرار کی کوشش کرنے والے افغانیوں کو منتشر کرنے کے لیے اِنتباہی فائرنگ بھی کی گئی ہے۔ (فوٹو: ٹوئٹر)

---

طالبان نے افغانستان سے فرار ہونے والے شہریوں کو روکنے کے لیے کابل ہوائی اڈے کو جانے والے تقریبا تمام راستے بند کردیے ہیں۔

الجزیرہ کے مطابق طالبان نے کابل ایئر پورٹ کا محاصرہ کرلیا ہے اور ایئرپورٹ تک جانے والے تقریبا تمام راستوں کو بند کردیا ہے، جب کہ فرار کی کوشش کرنے والے افغانیوں کو منتشر کرنے کے لیے اِنتباہی فائرنگ بھی کی گئی ہے۔

طالبان کا افغانستان میں جنگ کے خاتمے کا اعلان

غیر ملکی نشریاتی ادارے 'الجزیرہ ' کو دیئے گئے انٹرویو میں طالبان کے سیاسی دفتر کے ترجمان محمد نعیم نے کہا کہ آج افغان عوام اور مجاہدین کے لیے عظیم دن ہے۔ انہیں اپنی 20 برس کی قربانیوں اور جدوجہد کا پھل مل گیا ہے۔ خدا کا شکر ہے کہ ملک میں جاری جنگ ختم ہوئی، ہم اپنے مقصد تک پہنچ چکے ہیں جو کہ اپنے ملک اور عوام کی آزادی تھا۔ افغانستان کی نئی حکومت کی نوعیت جلد واضح ہو جائے گی، ہم تمام افغان رہنماؤں سے بات چیت کے لیے تیار ہیں اور ان کے تحفظ کی ضمانت دیتے ہیں۔

محمد نعیم نے کہا کہ ہم کسی کو اجازت نہیں دیں گے کہ کوئی ہماری زمین پر کسی کو نشانہ بنائے اور ہم دوسروں کو کوئی نقصان پہنچانا نہیں چاہتے۔ طالبان الگ تھلگ نہیں رہنا چاہتے، وہ دنیا کے ساتھ پرامن تعلقات کے خواہاں ہیں، امید ہے غیر ملکی قوتیں افغانستان میں اپنے ناکام تجربےنہیں دہرائیں گی۔

'ہماری اصل ذمہ داریاں تو اب شروع ہوتی ہیں'

دوسری جانب افغان طالبان کے سیاسی ونگ کے سربراہ ملا برادر نے اپنے وڈیو بیان میں کہا ہے کہ طالبان کی کامیابیوں کی مثال دنیا میں کہیں نہیں ملتی، افغانستان میں طالبان کی فتوحات پر مبارکباد پیش کرتا ہوں جو اللہ تعالیٰ کی نصرت اور مدد کے بغیر ممکن نہیں تھی۔ ہماری اصل ذمہ داریاں تو اب شروع ہوتی ہیں جس میں افغان عوام کی خدمت اور ان کے جان و مال کا تحفظ شامل ہے، افغان عوام کو یقین دلاتے ہیں کہ حالات کو بہتر کرنے میں بھرپور کردار ادا کریں گے۔

یہ بھی پڑھیں :عوام کے جان و مال کا تحفظ ہماری ذمہ داری

افغانستان کی تیزی سے بدلتی صورتحال پر بات چیت کے لیے افغانستان کی سیاسی قیادت کے دو وفود پاکستان میں موجود ہیں جو پاکستان حکام سے مذاکرات کے ساتھ ساتھ آئندہ کی صورت پر مشاورت کریں گے۔

یہ خبر بھی پڑھیں: افغان سیاسی قیادت کے 2 وفود پاکستان پہنچ گئے

دوسری جانب گزشتہ روز طالبان نے انتہائی سرعت کے ساتھ کابل میں داخل ہوکر افغان صدارتی محل پر قبضہ کرلیا تھا، جس کے بعد افغان صدر اشرف اور نائب صدر امراللہ صالح الگ الگ طیاروں کے ذریعے پڑوسی ملک تاجکستان چلے گئے ہیں۔

یہ بھی پڑھیں: خون ریزی سے بچنے کے لیے افغانستان چھوڑا