افغانستان کی صورتحال پر وزیرخارجہ اور امریکی ہم منصب کا ٹیلیفونک رابطہ

دونوں وزرائے خارجہ کا مشترکہ مقاصد کو فروغ دینے کے لیے قریبی رابطے میں رہنے پر اتفاق کیا۔

ویب ڈیسک August 17, 2021

افغانستان کے ساتھ امریکی اقتصادی روابط جاری رکھنا بھی اہمیت کا حامل ہے، شاہ محمود قریشی

وزیرخارجہ مخدوم شاہ محمود قریشی سے امریکی وزیرخارجہ اینٹونی جے بلنکن نے ٹیلی فونک رابطہ کیا۔

ترجمان دفترخارجہ کے مطابق وزیرخارجہ مخدوم شاہ محمود قریشی سے امریکی وزیرخارجہ اینٹونی جے بلنکن نے ٹیلی فونک رابطہ کیا اوردونوں رہنماوٴں نے افغانستان میں تیزی سے بدلتی صورتحال پر تبادلہ خیال کیا۔

وزیرخارجہ نے مختصرعرصے میں صورتحال میں نمایاں تبدیلی اورتشدد سے بچنے کے حوالے سے پاکستان کے نقطہ نظرسے آگاہ کیا۔ وزیر خارجہ نے آگے بڑھنے کے بہترین راستے کے طورپرجامع سیاسی تصفیے کی اہمیت پر زور دیا۔

ترجمان دفترخارجہ کے مطابق شاہ محمود قریشی نے کہا کہ پاکستان پرامن اورمستحکم افغانستان کے لیے امریکا اور دیگر بین الاقوامی شراکت داروں کے ساتھ قریبی رابطے میں رہے گا، افغانستان کے ساتھ امریکی اقتصادی روابط جاری رکھنا بھی اہمیت کا حامل ہے۔

شاہ محمود قریشی نے امریکی وزیرخارجہ کو سفارتی مشنوں، بین الاقوامی تنظیموں، میڈیا اوردیگر عملے کے انخلا میں سہولت فراہم کرنے کی پاکستان کی کوششوں سے بھی آگاہ کیا۔ دونوں وزرائے خارجہ کا مشترکہ مقاصد کو فروغ دینے کے لیے قریبی رابطے میں رہنے پراتفاق کیا۔