کیا کنگنا مسلمان لڑکے کی محبت میں گرفتار ہیں کمال خان کا اہم انکشاف

یہ لوو جہاد ہے، آپ سے یہ امید نہیں تھی، خود ساختہ فلمی ناقد

ویب ڈیسک August 17, 2021

یہ لوو جہاد ہے، آپ سے یہ امید نہیں تھی، خود ساختہ فلمی ناقد (فائل فوٹو)

PESHAWAR: بھارت کے خود ساختہ فلمی ناقد کمال آر خان نے اداکارہ کنگنا رناوت کی مسلمان لڑکے سے محبت کے حوالے سے اہم انکشاف کردیا ہے۔

کمال آر خان اکثر اپنے متنازعہ بیانات کے سبب خبروں میں رہتے ہیں۔ حال ہی میں فلمی ناقد نے اداکار سلمان خان کی فلم 'رادھے' پر منفی تبصرہ کیا تھا مگر اس مرتبہ کمال خان نے انکشاف کیا ہے کہ اداکارہ کنگنا رناوت ایک مسلمان لڑکے کی محبت میں گرفتار ہوگئی ہیں۔

خود ساختہ فلمی ناقد ٹوئٹر پر کافی متحرک رہتے ہیں۔ گزشتہ روز انہوں نے ٹوئٹ کرتے ہوئے کنگنا رناوت کی ایک لڑکے کے ہمراہ تصاویر شیئر کیں اور لکھا کہ 'کنگنا رناوت ایک عمران نامی مصری لڑکے کے ساتھ ڈیٹ کر رہی ہیں۔ یہ لوو جہاد ہے۔ آپ سے یہ امید نہیں تھی'۔

کمال خان نے اپنی اس ٹوئٹ کو چند ہی گھنٹے بعد ڈیلیٹ کردیا تاہم ٹوئٹر صارفین نے اس کے اسکرین شاٹ محفوظ کر لیے۔ کمال خان کی ٹوئٹ پر تاحال اداکارہ کی جانب سے کوئی بیان سامنے نہیں آیا۔

خیال رہے کہ کنگنا رناوت نے 28 جولائی کو اپنے انسٹاگرام اکاؤنٹ پر اسی لڑکے کے ساتھ اپنی تصاویر شیئر کی تھیں جس میں دونوں سالگرہ کا کیک کاٹ رہے تھے۔ کنگنا رناوت نے انسٹاگرام پوسٹ میں لڑکے کا نام 'رضوان' مینشن کیا تھا۔