سعودی عرب جانے والے پاکستانی مسافروں کو کینیا پہنچادیا گیا

100 سے زائد مسافروں کو کینیا میں قرنطینہ کردیا گیا . فوٹو : فائل

---

کورونا وبا نے پاکستانی مسافروں کو سعودی عرب کے بجائے کینیا پہنچادیا جہاں انہیں قرنطینہ میں ڈال دیا گیا۔

ذرائع کے مطابق پاکستان سے کنیکٹنگ فلائٹ سے سعودی عرب جانے والے پاکستانی مسافر نیروبی پہنچ گئے۔ پاکستانی مسافروں کو سعودیہ عرب نے داخلے سے روک دیا۔ 100 سے زائد مسافروں کو نیروبی میں 14 روز کے لیے قرنطینیہ کر دیا گیا، تمام پاکستانی مسافر فلائی دبئی کے ذریعے دبئی پہنچے جہاں سے انہیں براستہ کینیا ایئر لائن سعودی عرب پہنچنا تھا۔

کورونا وبا کے حوالے سے سعودیہ عرب کی جانب سے جاری ایس او پی کے مطابق پاکستانی مسافروں کو داخلے سے روکا گیا، مسافروں کے مطابق ان کی منزل سعودیہ عرب تھی مگر وہ کینیا کے شہر نیروبی میں محصور ہوگئے، تمام لوگ مکمل طور پر بے یار و مددگار ہیں، مسافروں کو نیروبی شہر میں ایک ہال میں رکھا گیا ہے۔

مسافروں نے حکومت سے درخواست کرتے ہوئے کہا ہے کہ ہمیں اس اذیت سے نجات دلائی جائے، ٹریول ایجنٹس کی غلط حکمت عملی کی وجہ پاکستانی مسافر اپنی گھر والوں کے ساتھ نیروبی میں پریشانی کا شکار ہیں۔