شوہر نے ذائقہ دار کھانا نہ بنانے پر بیوی کی جان لے لی

بھارت میں سنگدل شوہر نے ذائقہ دار کھانا نہ بنانے پر اپنی بیوی کو موت کی نیند سلا دیا۔

بھارتی ریاست کرناٹکا کے شہر بینگالورو میں 32 سالہ شخص نے اپنی 28 سالہ بیوی کو لذیذ کھانا نہ بنانے پر ڈنڈے مار مار کر اس کی جان لے لی اور گرفتاری سے بچنے کے لیے بیوی کی لاش کو بوری میں ڈال کر تالاب میں پھینک دی۔


ملزم نے سسرال والوں کو اطلاع دی کہ آپ کی بیٹی مجھے چھوڑ کر چلی گئی ہے۔ سسرال والوں نے پہلے تو بیٹی کو ہر جگہ تلاش کیا بعد ازاں شک کی بنیاد پر داماد کے خلاف ہی مقدمہ درج کرا دیا۔

پولیس نے جب شوہر کو گرفتار کیا تو ملزم نے دورانِ تفتیش بیوی کو قتل کر کے تالاب میں پھینکنے کا اعتراف کرلیا۔ ملزم کے اعتراف کے بعد پولیس نے تالاب میں لاش کی تلاش کی تاہم کوئی سراغ نہیں مل سکا۔