کراچی میں فائرنگ کے واقعات کے دوران 5افراد ہلاک

ہارون آباد میں فائرنگ سے بینک کا منیجر 40 سالہ خرم ہلاک ہوگیا،مقتول ہارون آبادمیں قائم نجی بینک کا برانچ منیجر تھا۔فوٹو:فائل

---

شہرکے مختلف علاقوں میں فائرنگ کے واقعات کے دوران بینک منیجرسمیت3افرادہلاک جبکہ خاتون سمیت 7 زخمی ہوگئے۔

تفصیلات کے مطابق سائٹ ہارون آباد میں فائرنگ سے بینک کا منیجر 40 سالہ خرم ہلاک ہوگیا،مقتول ہارون آبادمیں قائم نجی بینک کا برانچ منیجر تھا ،وہ اپنی کار میں جارہا تھا کہ موٹر سائیکل پر سوار ایک ملزم آیااورگردن پرگولی مارکرفرارہوگیا۔ ذرائع نے بتایا کہ واقعہ بھتہ خوری کاشاخسانہ ہوسکتا ہے۔بلدیہ اتحادٹائون کی قائم خانی کالونی میں نامعلوم افراد کی فائرنگ سے40سالہ سیکیورٹی گارڈگل رحمن ہلاک ہو گیا۔نیپئرسریاگلی میں موٹرسائیکل سواروں کی فائرنگ سے کارسوار55سالہ اقبال ہلاک ہوگیا،مقتول گارڈن ایسٹ کا رہائشی تھا۔لیاقت آباد C/1ایریاالیاس گوٹھ میں نامعلوم ملزمان کی فائرنگ سے 30 سالہ فاروق ہلاک ہوگیا،مقتول گھر کے قریب واقع پان کی دکان پرکھڑاتھاکہ جہاں 2 نامعلوم ملزمان نے فائرنگ کردی۔



مقتول الیاس گوٹھ کے مکان نمبر 194کارہائشی تھا۔عباس ٹاؤن پولیس چوکی کے قریب نامعلوم ملزمان کی فائرنگ سے 30 سالہ شخص ہلاک ہوگیا جس کی شناخت نہیں ہوسکی۔حسن اسکوائر کے قریب نامعلوم ملزمان کی فائرنگ سے 45 سالہ محمد اسمٰعیل ،کورنگی ڈھائی نمبر کے قریب فائرنگ سے 25 سالہ جنید،شریف آبادایف سی ایریامیں فائرنگ سے55سالہ غلام عابد،نیو سبزی منڈی گنا منڈی کے قریب فائرنگ سے45 سالہ محمود،اورنگی ٹائون میں35سالہ اظہارزخمی ہوگیا۔بغدادی کے علاقے احمدشاہ بخاری روڈپر نامعلوم افرادکی فائرنگ سے32سالہ شاہنواز جبکہ بن قاسم کے علاقے اسٹیل ٹائون میں نامعلوم افرادکی فائرنگ سے 55 سالہ خاتون شفقت شاہین زوجہ احمد اشرف زخمی ہوگئی۔