چین میں 7 سال کی عمر تک کے طلبا سے امتحانات لینے پر پابندی

امتحانات کا دباؤ کم سن بچوں کی ذہنی نشوونما کیلیے مضر ہے، فوتو: فائل

---

چین نے اپنے تعلیمی نظام میں بنیادی تبدیلی کرتے ہوئے 7 سال کی عمر تک کے بچوں کا امتحان لینے پر پابندی عائد کردی ہے۔

عالمی خبر رساں ادارے کے مطابق چین میں نرسری سے اعلیٰ تعلیم تک اگلی جماعتوں میں جانے کے لیے امتحان پاس کرنا ضروری ہے تاہم اب تعلیمی نظام میں بنیادی تبدیلیاں کی گئی ہیں۔

چین کی وزارت تعلیم کی جانب سے جاری بیان میں کہا گیا ہے کہ امتحانات میں سخت مقابلے کے دباؤ کی وجہ سے کم سن بچوں کی ذہنی اور جسمانی نشوونما میں برے اثرات مرتب ہوتے ہیں جب کہ والدین بھی پریشر کا شکار رہتے ہیں۔

بیان میں مزید کہا گیا ہے بچوں اور والدین کے ذہنی دباؤ کو دیکھتے ہوئے فیصلہ کیا گیا ہے کہ 7 سال کی عمر تک کے طلبا کا امتحان نہیں لیا جائے گا۔ 7 سال کی عمر تک بچے بغیر امتحان دیئے اگلی جماعتوں میں جاتے رہیں گے۔

نئے تعلیمی نظام میں بچوں کو سمسٹرز امتحانات، ماہانہ ٹیسٹ جیسے سلسلوں کو کم کرنے کی ہدایت کی گئی ہے اور سالانہ امتحانات پر زور دیا گیا ہے۔