تاجروں کا لاک ڈاؤن کے خلاف بھوک ہڑتال کا اعلان

سندھ حکومت کالاک ڈاؤن پر دہرا معیارہے، 44فیصد شہریوں نے ویکسین لگوائی پھربھی کاروبارکولاک ڈاؤن کے ذریعے جکڑا جارہا ہے.

Staff Reporter September 02, 2021

حکومت رات10بجے تک کاروبار،ہفتے میں ایک چھٹی،ریسٹورنٹس اورشادی ہالوں کوکام کی اجازت دے، تاجرایکشن کمیٹی۔ فوٹو : فائل

کراچی تاجر ایکشن کمیٹی نے حکومت سندھ کی جانب سے کراچی اور حیدرآباد کے تجارتی مراکز میں لاک ڈاؤن کو غیر منصفانہ قرار دیتے ہوئے اس اقدام کے خلاف جمعرات2 ستمبر کو ایم اے جناح روڈ پر بھوک ہڑتال کرنے کا اعلان کردیا ہے۔

آل کراچی تاجر ایکشن کمیٹی کے کنوینر محد رضوان نے بتایا کہ حکومت کے اپنے اعدادوشمار کے مطابق کراچی میں44 فیصد سے زائد شہریوں نے کورونا سے بچاؤ کی ویکسی نیشن کرالی ہے لیکن اس کے باوجود کراچی میں کاروباری شعبوں کو لاک ڈاؤن کے حصار میں جکڑا ہوا ہے جس سے محسوس ہوتاہے کہ کراچی میں سندھ حکومت نے لاک ڈاؤن کے حوالے سے دہرا معیار اپنایا ہوا ہے۔

انھوں نے بتایا کہ شہر کے سب سے بڑے کاروباری مرکز ضلع جنوبی میں 84 فیصد سے زائد ویکسی نیشن ہوچکی ہے، حکومت رات 10 بجے تک کاروبار کرنے کی اجازت دے اور اندرون سندھ کی طرح کراچی کے تاجروں کیلیے بھی ہفتے میں ایک دن کی چھٹی کا اعلان کرے ریسٹورنٹس میں ان ڈور ڈائننگ کی اجازت دی جائے اور ساتھ ہی شادی ہالوں کو بھی کام کی اجازت دے۔