مدت بھی پوری کریں گے اور آئندہ الیکشن بھی جیتیں گے عثمان بزدار

پی ڈی ایم راہزنوں کے ٹولے پر مشتمل غیر فطری اتحاد ہے، وزیراعلیٰ پنجاب

ویب ڈیسک September 03, 2021

عمران خان کی سیاست کے آگے پی ڈیم ایم کی کوٗی حیثیت نہیں، وزیراعلیٰ پنجاب (فوٹو: فائل)

وزیراعلیٰ پنجاب سردار عثمان بزدار نے کہا ہے کہ پی ڈی ایم کی سازشیں ناکام ثابت ہوئیں اور تحریک انصاف کی حکومت نہ صرف مدت پوری کرے گی بلکہ آئندہ الیکشن بھی جیتے گی۔

ایکسپریس نیوز کے مطابق وزیراعلیٰ پنجاب عثمان بزدار نے کہا ہے کہ پی ڈی ایم میں سارے مفاد پرست لوگ جمع ہیں جن کا کوئی ایجنڈا نہیں۔ یہ راہزنوں کے ٹولے پر مشتمل غیر فطری اتحاد ہے۔

عثمان بزدار نے مزید کہا ہے کہ وزیراعظم عمران خان کی شفاف سیاست کے سامنے یہ غیر فطری اتحاد کوئی حیثیت نہیں رکھتا۔ مفاد پرستوں کے اس ٹولے نے عوام کو گمراہ کرنے کی کوشش کی لیکن اللہ کے فضل وکرم اور عوام کی حمایت سے پی ڈی ایم کی ہر سازش ناکام ہوئی۔

وزیراعلیٰ پنجاب نے مزید کہا کہ قوم کے ٹھکرائے ہوئے عناصر کو انتشار کی سیاست چھوڑ کر مثبت رویہ اختیار کرنا چاہیے۔ پی ڈی ایم کی ساری جماعتیں زبانی جمع خرچ پر لگی ہوئی ہیں۔

عثمان بزدار نے کہا کہ وزیراعظم عمران خان کی قیادت میں حکومت پہلے سے زیادہ مضبوط ہے۔ ہم مدت بھی پوری کریں گے اوران شاء اللہ آئندہ الیکشن میں بھی تحریک انصاف کامیاب ہوگی۔