نیوزی لینڈ داعش کا حامی چاقو بردار حملہ آور پولیس فائرنگ سے ہلاک

یہ ایک شخص کا ذاتی عمل ہے اسے مذہب یا عقیدے سے نہ جوڑا جائے، وزیراعظم جسینڈا آرڈرن

ویب ڈیسک September 03, 2021

ایک زخمی خاتون کو اسپتال منتقل کیا جا رہا ہے، فوٹو: اے ایف پی

نیوزی لینڈ میں داعش سے متاثر ایک شخص نے راہگیروں پر چاقو کے وار کرکے 7 کو زخمی کردیا جب کہ پولیس کی جوابی فائرنگ میں حملہ آور مارا گیا۔

عالمی خبر رساں ادارے کے مطابق آکلینڈ میں چاقو بردار شخص نے ایک شاپنگ مال کے نزدیک راہگیروں پر حملہ کردیا جس کے نتیجے میں 7 افراد زخمی ہوگئے۔ زخمیوں میں سے 2 کی حالت نازک بتائی جا رہی ہے۔

اطلاع ملتے ہی پولیس جائے وقوعہ پر پہنچی اور حملہ آور کو گھر لیا تاہم ملزم نے گرفتاری دینے کے بجائے ایک شہری کو دبوچ کر ڈھال بنانے کی کوشش کی جس پر پولیس نے فائرنگ کرکے حملہ آور کو ہلاک کردیا۔

یہ خبر پڑھیں : نیوزی لینڈ میں دہشتگردی کا بدترین واقعہ، 2 مساجد میں فائرنگ سے 49 نمازی شہید

نیوزی لینڈ کی وزیر اعظم جیسنڈا آرڈرن نے پریس کانفرنس میں واقعے کو قابل نفرت انگیز قرار دیتے ہوئے کہا کہ یہ فعل ایک شخص کا ذاتی فعل ہے اسے اس کے ایمان اور مذہب کے تناظر میں نہ دیکھا جائے۔

وزیراعظم نے مزید بتایا کہ حملہ آور سری لنکا کا شہری تھا اور 2011 میں نیوزی لینڈ پہنچا تھا۔ یہ شخص داعش سے متاثر تھا اور 2016 سے ایجنسیوں کی نگرانی میں تھا۔

پولیس کمشنر اینڈریو کوسٹر نے شہریوں کو یقین دلایا کہ ملزم نے تنہا ہی اس کام کو سر انجام دیا ہے، اس میں کوئی گروپ شامل نہیں اور کمیونٹی کو مزید کوئی خطرہ نہیں ہے۔