کراچی میں چند روز بعد مزید بارشوں کی پیش گوئی

محکمہ موسمیات نے کراچی میں 9 ستمبر سے مزید بارشوں کی پیش گوئی کردی۔

محکمہ موسمیات کے مطابق خلیج بنگال میں ہوا کا ایک اور کم دباؤ بن گیا ہے جس کے اثرات اگلے چند روز میں سندھ پر نمودار ہوسکتے ہیں، ہوا کا کم دباؤ درمیانی شدت کے مون سون بارشوں کے سسٹم کی شکل میں 7 اور 8 ستمبرکو سندھ میں داخل ہوگا، نتیجے میں 8 ستمبر سے مشرقی سندھ اور 9 ستمبر سے کراچی میں بارش ہونے کا امکان ہے۔


محکمہ موسمیات کا کہنا ہے کہ کراچی سمیت دیہی سندھ کے مختلف اضلاع میں کہیں درمیانی اور کہیں تیز بارش کا امکان ہے، بارش کا سسٹم سینٹرل انڈیا اور بھارتی راجستھان سے سندھ کا رخ کرے گا، کراچی میں اس سسٹم کے زیر اثر بارشوں کی شدت کے حوالے سے 7 ستمبر کو وثوق سے پیش گوئی کی جاسکے گی۔

محکمہ موسمیات کے مطابق گزشتہ دنوں شہر میں 133 ملی میٹر بارشوں کا سبب بننے والا مون سون سسٹم مکمل طور پر ختم ہوچکا ہے، اتوار کو سمندر کی غیر فعال ہوائیں مکمل طور پر بحال رہیں جس کی رفتار 20 کلومیٹر فی گھنٹہ ریکارڈ ہوئی، اتوار کو شہر کا زیادہ سے زیادہ درجہ حرارت 33.1 ڈگری جبکہ کم سے کم 24.7 ڈگری سینٹی گریڈ ریکارڈ ہوا، جب کہ پیر کو مطلع صاف اور جزوی ابرآلود رہنے کی توقع ہے۔