سوشل میڈیا پر یاسر نواز بھی اہلیہ ندا کا مذاق اڑانے لگے

یاسر نواز ویڈیو میں سر پر ڈوپٹہ اوڑھے ندا کے وائرل کلپ کی نقل کرتے ہوئے نظر آرہے ہیں

ویب ڈیسک September 09, 2021

یاسر نواز نے اس ویڈیو کے کیپشن کے ساتھ کچھ لکھا تو نہیں صرف ہنسنے والے ایموجی لگائے فوٹوسوشل میڈیا

اداکارو ہدایت کار یاسر نواز نے سوشل میڈیا پر ایک ویڈیو شیئر کی ہے جس میں وہ اپنی اہلیہ ندا کا مذاق اڑاتے ہوئے نظر آرہے ہیں۔

چند روز قبل مارننگ شو کی میزبان ندا یاسر کے شو کی ایک پرانی مختصر ویڈیو وائرل ہوئی تھی جس میں وہ فارمولا ون کار سے متعلق اس کار کوبنانے والے دو طالبعلموں سے سوالات کررہی تھیں۔ لیکن ان کے سوالوں سے اندازہ ہورہا تھا کہ انہیں نا تو فارمولاون کار کے بارے میں کوئی معلومات ہیں اور نہ ہی انہوں نے شو کرنے سے پہلے شو کے موضوع کے حوالے سے تھوڑی سی بھی ریسرچ کرنے کی زحمت گوارا کی ہے۔

اپنی کم علمی اور بے تکے سوالات کی وجہ سے ندا یاسر شو کے دوران کافی عجیب لگ رہی تھیں اور یہی بات سوشل میڈیا صارفین نے بھی نوٹ کی اور ان کا خوب مذاق اڑایا۔ یہاں تک کہ ان کا نام ٹوئٹر پر دو دن تک ٹرینڈ میں رہاتھا۔ لوگوں نے ندا یاسر کا مذاق اڑاتے ہوئے کہا تھا ندا اپنے شو میں صرف شادیاں ہی کروائیں، تو کسی نے کہا ایسا تب ہوتا ہے جب آپ اپنی ڈگری آن لائن مکمل کرتے ہیں۔ اس کے علاوہ ندا پر بہت ساری میمز بھی بنی تھیں۔

یہ بھی پڑھیں: 'فارمولا ون' کارسے متعلق تنقید پرندا یاسرکا ردعمل

جب تنقید حد سے زیادہ بڑھ گئی تو ندا نے خود منظرعام پر آکر اپنی غلطی کے لیے معافی مانگتے ہوئے کہا تھا کہ آئندہ وہ کوشش کریں گی کہ شو کے موضوع کے بارے میں مکمل ریسرچ کرکے ہی بات کریں۔

لیکن ندا کا مذاق اڑانے والوں میں صرف سوشل میڈیا صارفین ہی شامل نہیں ہیں بلکہ ان کے شوہر بھی اب ان کا مذاق اڑانے والوں میں شامل ہوگئے ہیں۔ یاسر نواز نے گزشتہ روز اپنے سوشل میڈیا اکاؤنٹ پر ایک ویڈیو شیئر کی جس میں وہ سر پر ڈوپٹہ اوڑھے ندا کے اسی وائرل کلپ کی نقل کرتے ہوئے نظر آرہے ہیں۔ یاسر نواز نے اس ویڈیو کے کیپشن کے ساتھ کچھ لکھا تو نہیں صرف ہنسنے والے ایموجی لگائے۔
[instagram-post url="https://www.instagram.com/p/CTj3Xd8oydP/"]

یاسر نواز کی ویڈیو پر سوشل میڈیا صارفین کے ساتھ دیگر فنکار بھی تبصرے کرتے ہوئے خوب لطف لے رہے ہیں۔ ایک صارف نے لکھا اپنی بیوی کی بے عزتی کا موقع مل گیا جب کہ ایک اور صارف نے لکھا گھر نہیں جانا آپ کو بھائی۔ تاہم ندا نے ابھی تک یاسر کی اس ویڈیو پر کوئی ردعمل نہیں دیا ہے۔