معروف بھارتی اداکارنے شہری کو اپنی گاڑی کے نیچے کچل دیا

اداکار رجت بیدی نے اعتراف بھی کیا تھا کہ اس نے اپنی گاڑی سے اس شخص کو ٹکر ماری ہے

ویب ڈیسک September 09, 2021

ہلاک ہونےوالے شخص کے پسماندگان میں بیوی اور دو بیٹیاں شامل ہیں فوٹوفائل

بالی ووڈ اداکار رجت بیدی کی کار سے ٹکرا کر زخمی ہونے والا شخص زخموں کی تاب نہ لاتے ہوئے چل بسا۔

اداکار رجت بیدی کا نام حال ہی میں ایک سڑک حادثے میں سامنے آیا تھا جس میں ایک شخص رجت بیدی کی گاڑی سے ٹکرا کر بری طرح زخمی ہوگیا تھا۔ بھارتی میڈیا کے مطابق اس حادثے میں زخمی ہونے والا شخص دوران علاج چل بسا۔ جس کے بعد پولیس نے اداکار کے خلاف درج ایف آئی آر میں انڈین پینل کوڈ کی دفعہ 304 اے (غفلت کی وجہ سے موت) بھی شامل کردی ہے۔

میڈیا رپورٹس کے مطابق اداکار رجت بیدی کو ابھی تک گرفتار نہیں کیا جا سکا ہے۔ انٹرویو کے دوران ایک عہدیدار نے بتایا کہ حادثے میں متاثر ہونے والا مزدور راجیش بودھ جو گزشتہ دو دنوں سے کوپر اسپتال میں زیر علاج تھا اسے مردہ قرار دے دیا گیا ہے۔

علاوہ ازیں میڈیا رپورٹس کے مطابق حادثہ 6 ستمبر کی شام تقریباً ساڑھے 6 بجے ممبئی کے علاقے اندھیری میں شیتلا دیوی بس اسٹاپ کے نزدیک پیش آیا تھا۔ جس کے بعد اداکار کے خلاف ڈی این نگر پولیس اسٹیشن میں انڈین پینل کوڈ کی دفعہ 279 (تیزرفتاری سے گلاڑی چلانے)، 338 اور 184 کے تحت مقدمہ درج کیا گیا تھا۔

رپورٹس کے مطابق راجیش بودھ کو اپنی گاڑی سے ٹکر مارنے کے بعد اداکارنے اس شخص کو کوپر اسپتال پہنچایا اور یہ اعتراف بھی کیا کہ اس نے اپنی گاڑی سے اس شخص کو ٹکر ماری ہے۔ اس کے علاوہ اداکار رجت بیدی نے اسپتال میں متاثرہ شخص کے اہلخانہ سے ہر طرح سے مدد کرنے کا وعدہ بھی کیا تھا لیکن متاثرہ شخص کو اسپتال میں داخل کروانے کے بعد اداکار دوبارہ واپس آئے ہی نہیں۔

دوسری طرف گاڑی کی ٹکر سے ہلاک ہونے والے شخص راجیش بودھ کے سر کے پچھلے حصے پر چوٹیں آئی تھیں اور اس کی حالت تشویشناک بتائی جارہی تھی کیونکہ مبینہ طور پر اس کا بہت خون بہاتھا۔ ہلاک ہونے والے شخص کے پسماندگان میں بیوی اور دو بیٹیاں شامل ہیں جن کی عمریں بالترتیب 7 اور 13 سال ہیں۔

واضح رہے کہ اداکار رجت بیدی 40 سے زائد فلموں میں نظر آچکے ہیں، جن میں ''رخت''، ''دی ٹرین ''،''خاموش''، اور ''کوئی مل گیا'' وغیرہ شامل ہیں۔