پاکستان اور نیوزی لینڈ کے درمیان ون ڈے  سیریز  کا اسٹیٹس تبدیل 

یہ تینوں میچز اب آئی سی سی کرکٹ ورلڈ کپ سپر لیگ کے بجائے دو طرفہ سیریز کے میچز شمار کیے جائیں گے

---

پاکستان اور نیوزی لینڈ کے مابین ون ڈے انٹرنیشنل سیریز کا اسٹیٹس تبدیل کردیا گیا۔

پاکستان کرکٹ بورڈ اور نیوزی لینڈ کرکٹ نے متفقہ طور پر فیصلہ کیا ہے کہ آئندہ ہفتے راولپنڈی میں کھیلے جانے والے تین ون ڈے انٹرنیشنل میچز کا اسٹیٹس تبدیل کردیا گیا ہے۔ یہ تینوں میچز اب آئی سی سی کرکٹ ورلڈ کپ سپر لیگ کے بجائے دو طرفہ سیریز کے میچز شمار کیے جائیں گے۔ یہ فیصلہ ڈی آر ایس کی عدم دستیابی کے باعث کیا گیا ہے جو کہ آئی سی سی ورلڈکپ سپر لیگ کی پلیئنگ کنڈیشنز کا ضروری حصہ ہے۔

نیوزی لینڈ کو اب 2 ٹیسٹ اور 3 ون ڈے انٹرنیشنل میچز پر مشتمل سیریز کھیلنے کے لیے دوبارہ 2022 میں پاکستان کا دورہ کرنا ہے۔ لہذا دونوں بورڈز نے اتفاق کیا ہے کہ اب اُس سیریز میں شامل تین ون ڈے انٹرنیشنل میچز آئی سی سی مینز کرکٹ ورلڈ کپ 2023 کی کوالی فکیشن کہلائیں گے۔