بحیرہ احمر پر سعودی ولی عہد امیر قطر اور اماراتی مشیر کی ’سیاسی پکنک‘

تینوں رہنماؤں کے درمیان ملاقات بحیرہ احمر میں ہوئی، فوٹو: ٹوئٹر

---

بحیرہ احمر پر سعودی ولی عہد محمد بن سلمان، قطر کے امیر تمیم بن حمد آل ثانی اور متحدہ عرب امارات کی قومی سلامتی کے مشیر شیخ تہنون بن زائد نے برادرانہ ماحول میں ملاقات کی۔

عالمی خبر رساں ادارے کے مطابق قطر سے عرب ممالک کے تعلقات میں ہر گزرتے دن کے ساتھ بہتری آتی جارہی ہے۔ 2017 میں عائد پابندیوں کے بعد اب سعودی عرب سمیت دیگر عرب ممالک نے سفارتی و تجارتی تعلقات کی بحالی کا اعلان کردیا ہے تاہم متحدہ عرب امارات نے ہچکچاہٹ کا مظاہرہ کیا تھا۔

تاہم اب سعودی ولی عہد کے نجی دفتر کے ڈائریکٹر بدر العساکر نے ٹوئٹر پر ایک تصویر شیئر کی ہے جس میں امیر قطر شیخ تمیم بن حمد آل ثانی، سعودی ولی عہد شہزادہ محمد بن سلمان بن عبدالعزیز آل سعود اور متحدہ عرب امارات کے قومی سلامتی کے مشیر شیخ تہنون بن زاید آل نہیان ٹی شرٹ اور شارٹس پہنے خوش گوار موڈ میں نظر آرہے ہیں۔

لقاء ودي أخوي بالبحر الأحمر
يجمع سمو سيدي الأمير محمد بن سلمان وأمير دولة قطر الشيخ تميم بن حمد آل ثاني، ومستشار الأمن الوطني في دولة الإمارات الشيخ طحنون بن زايد آل نهيان. pic.twitter.com/2nAUJ8HPM5

— بدر العساكر Bader Al Asaker (@Badermasaker) September 17, 2021

بدر العساکر نے ٹوئٹ کے کیپشن میں لکھا کہ تینوں رہنماؤں کی ملاقات جمعہ کے روز بحیرہ احمر میں ہوئی یہ ایک کلف سے پاک اور برادرانہ ماحول میں ہونے والی ملاقات تھی۔

تینوں شہزادوں کے لباس سے بھی ظاہر ہوتا ہے کہ یہ ملاقات نجی ماحول میں ہوئی ہے اور ایسا لگتا ہے کہ تنازعوں کے حل کے لیے شہزادوں نے پکنک پوائنٹ کا انتخاب کیا ہے۔ متحدہ عرب امارات کے مشیر کی امیرِ قطر سے 4 سال بعد ملاقات ہوئی ہے۔

سعودی عرب، متحدہ عرب امارات، بحرین اور مصر نے دہشت گردی کی حمایت کا الزام عائد کرتے ہوئے 2017 میں قطر پر سفارتی، تجارتی اور سفری پابندی عائد کردی تھیں تاہم قطر نے ان الزامات کی سختی سے تردید کی تھی۔

رواں برس کے آغاز میں امریکی ثالثی میں قطر کے سعودی عرب اور تین دیگر عرب ممالک کے ساتھ معاہدے میں پیش رفت ہوئی تھی جس کے بعد سعودی عرب اور مصر نے تو سفارتی تعلقات بھی بحال کرلیے ہیں۔