پرویز مشرف پر غداری کے علاوہ مزید مقدمات بھی چلنے چاہئیں خواجہ سعد رفیق

فرد واحد نے متعلق العنان حکمرانی کیلئے پاکستان کے ساتھ ساتھ افغانستان کو بھی داؤ پر لگایا، وزیر ریلوے فوٹو: فائل

---

KARACHI: وفاقی وزیر ریلوے خواجہ سعد رفیق کا کہنا ہے کہ پرویز مشرف کے خلاف نہ صرف غداری بلکہ مزید مقدمات بھی چلنے چاہئیں۔

لاہور میں میڈیا سے بات کرتے ہوئے خواجہ سعد رفیق نے کہا کہ پرویز مشرف کے خلاف بہت سےالزامات ہیں اس لئے ان پر مزید مقدمات چلنے چاہئیں، ان کی بزدلانہ پالیسیوں نےملک کونقصان پہنچایا وہ عدالت یا حکومت نہیں بلکہ اللہ کی گرفت میں ہیں، انہیں کسی معاملے میں رعایت نہیں ملنی چاہئے اور آئین شکنوں کوکسی صورت معاف نہیں کیاجاسکتا۔

خواجہ سعد رفیق کا کہنا تھا کہ فرد واحد نے متعلق العنان حکمرانی کے لئے پاکستان کے ساتھ ساتھ افغانستان کو بھی داؤ پر لگایا، پرویز مشرف کو کوئی حق نہیں تھا کہ افغانستان کی آزادی سلب کرتے، پاکستان تو پھر بھی سنبھل گیا مگرافغانیوں کی قسمت کا فیصلہ ابھی باقی ہے۔