لاہور میں نرس کو ہراساں کرنے والا اوباش نوجوان گرفتار

شعیب نامی اوباش نوجوان نے کام پر جانے والی لڑکی کو زبردستی موٹرسائیکل پر بٹھانے کی کوشش کی۔(فوٹو: ایکسپریس)

---

پولیس نے نرس کو ہراساں کرنے والے اوباش نوجوان کو حوالات میں بند کردیا۔

ایس پی سول لائنز نے بتایا کہ تھانہ ریس کورس پولیس نے نرس کو ہراساں کرنے والے اوباش نوجوان کو گرفتار کرلیا۔ سی سی پی او لاہور کے حکم پر ملزم کے خلاف مقدمہ درج کرکے حوالات میں بند کردیا گیا۔

ایس پی رضا صفدر کاظمی کے مطابق شعیب نامی اوباش نوجوان نے ملازمت پر جانے والی لڑکی کو زبردستی موٹرسائیکل پر بٹھانے کی کوشش کی، لڑکی کے انکار پر ملزم نے سنگین نتائج کی دھمکیاں دینا شروع کر دیں، ملزم لڑکی کا پیچھا کرتے ہوئے اسے مسلسل ہراساں کرتا رہا۔

لڑکی نے موٹرسائیکل کا نمبر یاد کرکے ون فائیو پر کال کردی جس پر فوری ردعمل دیتے ہوئے ملزم کو دھر لیا گیا۔ سی سی پی او لاہور غلام محمود ڈوگر کے مطابق خواتین و بچوں کا جنسی استحصال کسی صورت برداشت نہیں۔