یمن میں عرب فوجی اتحاد کی کارروائیوں میں 90 سے زائد حوثی باغی ہلاک

یمن میں عرب فوجی اتحاد نے 24 گھنٹے کے دوران مختلف کارروائیوں میں 90 سے زائد حوثی باغیوں کو ہلاک کردیا ہے۔

العربیہ کے مطابق عرب فوجی اتحاد کی جانب سے جاری بیان میں کہا گیا ہے کہ 24 گھنٹے کے دوران یمن کے علاقے الجوبہ اور القصرا میں مختلف کارروائیوں میں 92 حوثی باغی ہلاک جبکہ 16 فوجی گاڑیوں کو تباہ کیا گیا ہے۔


جمعرات کو عرب فوجی اتحاد نے ایرانی حمایت یافتہ حوثی باغیوں کے خطرات کے جواب میں یمن کے دارالحکومت صنعا میں فوجی آپریشن شروع کردیا ہے۔ فوجی اتحاد کا کہنا ہے کہ یمن میں انسانی حقوق کی خلاف ورزیاں ہوتی رہیں تو انسانی حقوق کے عالمی قوانین کی روشنی میں حوثیوں کے خلاف سخت کارروائی کریں گے، گزشتہ چند ماہ کے دوران یمن میں انسانی حقوق کی سنگین خلاف ورزیوں پر انتہائی صبر و تحمل کا مظاہرہ کیا ہے۔

عرب اتحاد کے ترجمان ترکی المالکی کا کہنا تھا کہ عالمی قانون کی روشنی میں آپریشن شروع کیا گیا ہے جس میں عام شہریوں کو نقصان سے بچانے کےلیے حفاظتی اقدامات کیے گئے ہیں۔