ممبئی ہائی کورٹ نے آریان خان کی ضمانت منظور کرلی

ممبئی ہائی کورٹ نے منشیات کیس میں بالی وڈ کے 'کنگ' شاہ رخ خان کے بیٹے آریان خان کی ضمانت کی درخواست منظور کرلی ہے۔

بھارتی میڈیا کے مطابق ممبئی ہائی کورٹ میں منشیات استعمال کرنے کے کیس میں گرفتار آریان خان کی ضمانت کی درخواست پر سماعت ہوئی جس میں عدالت نے آریان اور این سی بی کے وکلا کے دلائل سنے اور ضمانت کا فیصلہ دیا۔

آریان کی ضمانت منظور پر این سی بی وکیل کی جانب سے مخالفت کی گئی اور کہا گیا کہ آریان نہ صرف منشیات استعمال کرنے میں ملوث ہے بلکہ اس کی اسمگلنگ بھی کرتا ہے۔


شاہ رخ خان کے بیٹے کی جانب سے 20 اکتوبر کو ممبئی ہائی کورٹ میں درخواست ضمانت دائر کی گئی تھی جس پر 26 سے 28 اکتوبر تک سماعت جاری رہی۔

آریان کے وکیل نے ضمانت منظور ہونے کے بعد میڈیا سے گفتگو کرتے ہوئے کہا کہ عدالت کی جانب سے ضمانت پر تفصیلی فیصلہ کل جاری کیا جائے گا اور امید ہے کہ عدالت کل ہی آریان کو رہا کرنے کے احکامات جاری کرے گی۔